ديوان (رباعيات شعبية) احمد الناصر الأحمد
( رباعيات شعبية )
احمد الناصر الأحمد
رباعيات شعبية إصدار يضم بعض المقطوعات الشعرية التي كتبها احمد الناصر الأحمد في مختلف اغراض الشعر والمكونة من ( ٤ ) ابيات فقط .. بعضها من البديات التي تم نشرها بنفس الأسم في جريدة الجزيرة السعودية .. عدد من هذه الرباعيات لم تقرؤوه من قبل.
القرآن الكريم
هذا كتــــاب مايقــــــــارن بغيـــــره
هذا كتاب الحـــــق والصدق والنور
فيه السور نـــــــور البصر والبصيرة
محفوظ بأمر الله عن الشك والزور
فيه الكبيرة واضـــــــحة والصغيرة
منهاج صدق وعدل مـرشد ودستور
نــزل على الهـــــادي وقاد المسيرة
من بعثة محـــمد الى نفخة الصـور
يابوي
يابـــــوي عساك بالجـنّة
ياناصــر محمــد الأحمد
يابــــــو العطــــايا بلامنّه
يالعابد الزاهــــد الامجد
مصحفك يبكي وله حنّه
والناس بالخير لك تشهد
والفـرض يفقدك والسنّة
ومكانك بروضة المسجد
بريدة
من حروف اسمك نظمت احـلى قصيد
ومن جمالك تشرق حــــروف القصيدة
(ب) بادية للناس بالحســــن الأكــــــــيد
(ر) راسخة بالكـــون بالسيرة المجــيدة
(ي) جمــــــال فاض بالمجـــــــــد التليد
(د) دام عـــزك .. دامت سنينك سعيدة
(هـ) هاض شعري فيك في احـلى نشيد
كل مــــن عــرفك يحبك يا { بريــــــدة }
جرح الفقد
شوق وحنين وذكـــريات ومشاريه
تفيض من راسي لحضن المخــدة
رحـــلت قلق والأسئلة تعشق التيه
ورمل الجفا يدفـن غــ،دير المودة
وغياب من تعشق ولك خاطر ٍ فيه
لاغاب .. غاب ومستحيل ٍ تــــرده
ياناس جــرح الفقد صعب ٍ تداويه
يبتل مع الاعــــــــوام ويزيد شِدّة
اودية الحلم
للقلب هاجـــــس للخيال إستداره
بين الخيال وهاجس القلب محتار
آمال تبرق والمطــــــر في غــــزارة
والارض عطشى كيف ماتنبت اشجار
والحــــــــــلم يفتــــح اودية للإثارة
ويعزف تقاسيم الفـرح بين الاشجار
واللي تربى فـي رحـــــــاب الطهارة
قادر على فهم المشاعـــر والاشعار
العين
قالوا : من اول وهلة تعرف الناس
طالــــــع ملامحهم تعـــرف الخفايا
وانا اقول : العين مـرآة الإحساس
مـــن صدقها تصدق جميع المرآيا
العين غيمة دمــع وامطار الانفاس
بــــــروقها ..... متغلغله بالحـــــنايا
فيها براءة طفل مـــع لمعة الماس
واكبر عــــدو للعين .. خبث النوايا
البلوت
هـــــادي صامــــــت وظنيته جبل
يعشق التفكير باحضان السكــوت
حتى جـــــــــت ليله تمنينا حـــبل
نربـــــــط المسكين ذلينا يموت !
قلت راع الصمت وشلون انهبل ؟!
عند صـــــــوته ماتحس بأي صوت
من سحبها صـــــن .. قالوا له دبل
ضاعت اعصابه على شان البلوت !!
العنوان
الستر والصمـــــت للإنسان
فيها ضمـــان ٍ عـــن الطيحة
واللي تعـــــوّد على الكتمان
شهـم ٍ .. بعيـــــدة مراويحه
خل التعامـــــل مـع العنوان
مـــالك لــــزوم ٍ ... بتنقيحه!
وحـــذراك لاتكشف الغطيان
تصِدم من الطعــــم والريـحة
الرس
الرس ديــــــرة عارفين المـــواجيب
اللي لهم في ساحـــــة العـــــــز رآية
اهل الوفاء والخير والجود والطيب
بيض الوجيـــــــه وكارهين الوشاية
من طيبهم تغـــــرق بزين التراحيب
ومن صدقهم كنك تشاهــــــد مرآية
قل للعليل يــــــروح للــرس ويطيب
هــــــــذي حقيقة لاتحسبه دعــــاية
وادي الرمة
حييت يا وادي_الرمــة طاب ملفاك
الخير شوفك .. والسعادة قــدومك
اعيــــــوننا ترقبك من يـوم ممشاك
يامحـــــلا ليلك وياطــيب يـــــــومك
شــــــــرفتنا في منطقتنا..وحـــياك
في ماك في طينك..هديرك عقومك
هـــذا القصــــيم بكل شوق يتحراك
وياكــــبر فــرحتنا بلحظة قـــدومك
معايدة
عيدك مبارك ياوجه الخـير
ياغالي ... سيـــرته تــحمـد
قطفت لك اجمــــل التعبير
واخترت من شعـري الأجود
التهنئة مــن غــــلاتك غيـــر
يالـــــورد يالمسك يالعسجد
اسمى التهاني مـع التقــدير
من : احمد الناصر الأحمد
منتصف شهر الصيام
في منتصف شهر الصيام
طالبك يـــــــارب الانـــــام
تلطـف بكــــــل المتعبين
من المرض ومن السقام
وتجعل قبــــور الميـــتين
نــــور ورضا بـــــرد وسلام
وتغفـــــر جميــــــع ذنوبنا
وتكتب لنا حسن الخـــتام
المزاج متعكر
سمــع أذان الفـجــر فتّــح عيـونه
جلس دقايــــق ماتحـــــرّك يفــكّر
يشعــــر بأن النـــوم يثقل جفــونه
والجــــــو بارد والمــــــزاج متعكّر
قال الصلاة الديـن مايجــــوز دونه
وحاول عـــــن افكار ٍ تــــردّه يسكّر
جـــاه الـذي كـــل المـــــلا يلعنـونه
قال : إستريــح شوي تــوّك مبكّر !!
الرجولة
معنى الرجولة واضح ٍ واختصرته
لمحت له من دون شرح ٍ وتعليق
كم واحــــــد ٍ لاحل ذكره شكرته
مشهود له بالطيب بين المخاليق
وكم نادر ٍ لاضاق صــــدرك نحرته
ذا راعي الفزعات في حزّة الضيق
وكم واحــــد ٍ لاحل ذكره طمـرته
ما احـــد ٍ ذكر له وقفة ٍ بلة الريق
برق الكتابة
في داخلي بــــــرق الكتابة اذا لاح
تمطر احاسيسي وتعشب حـروفي
ويفيض سيلي داخل الروح وارتاح
وتنبت ورود الحب في قاع جوفي
استنطق الفكرة والاحساس لمّاح
ومانيب اترجم بالقصايـــد ظروفي
انا اكتب قلوب واحاسيس وارواح
وماني على كسب الخلايق شغوفي
ديم
نحمد المـولى على الخير العميم
خامس الأيام..والامطـــــار ديـــــم
وصارت الاجـــواء بفضل الله روعه
المطــــر نعمة مــــن الرب الكريم
وصارت بريـــدة من الفرحة تباهى
والفـــرح والخير في كل #القصيم
ومملكتنا كلها بـ امـــــــن وسعادة
خيرها يشمل مواطـــــن والمقيـم
سيد البيد
ياعاشق الصمت هل يكفيك تلميحي
الفهم يغنيك عن بوحــــي وتصريحي
مازلت ابحثُ .. عــــــن تحقيق أُمْنِيَةٍ
نذرتها للثرى .. فـ إستدرجت ريــحي
كــــــــــم بت ُ ارقبها .. بالليل تتبعني
وتختفي حينما ضاءت مصابيـــــحي
(قصائــــــــــدي .. اينما ينتابني قلقي
ومنزلي .. حيثما ألقي مفاتيــــحي)
جمر الذكريات
بعض المواقف ماتموت ابـ مهدها
وش بعـــدها؟ .. ياكثر شي ٍ بعدها
بين التوجـــد .. والحنين المتصل
وطــول الليالي والعيـون وسهدها
الذكــــريات .. وجمــرها ماينطفي
عـن السنين الماضيـات .. وعـدّها
مابين ضحكاتك ودمعاتك يطـــول
درب الحيـاة ابهــزلها وبجــــــدها
شيء من الفصيح
ويحي على الشعِر ان القوم ماخجِلوا
من سوء ما نضموا اوقبح ما ارتجلوا
اين القصيد .. واين الشعِر اجمله ُ ؟!
إني ارى الشعر منكم .. صابه الوجل ُ
مايُكتب اليــــــــوم نضما .. لاحياة به ِ
يا بئس ماكتبوا .. يابئس مازجـــــــلوا
قلت : اسمعيني ..فجاء الردُ في عجل ٍ
( ويلي عليك .. وويلي منك يارجــلُ )!
عرقوب
خلف الوعد بالدين ماهوب مرغوب
يوصل الى درب الجـــــفا والقطاعة
ياما من اسبابه تباعـــــد من قلوب
وياما على شانه تشتت جـــــــماعة
خصلة نفاق ٍ تجلب آثام وذنـــــــوب
وإلا الوفي بالدين ياخـــــــــذ مناعة
دام البشر موجــــــــــود عــــرقوب
لو حـــــط فــــي بيته ثلاثين ساعة!
إقبالة البرد
محـــــتاج لك بالحيل بقبالة البـرد
مـــن فيه غيرك في دفاه احتواني
كل الصحاري من بعد غيبتك جرد
ياشيح ياقيصوم .. ياقحــــــــوياني
مجتمعة كـــل البشر فيك يافــرد
مايشبهك بالناس مخلــــــوق ثاني
الضحك والسهرات والعطر والورد
الكل " ينطر " عــودتك يا الاناني !!
قاعة الافراح والمقابر
ياصاحبي بالامس واخــوي هالحين
ابشــــــــــرك مازلت ثابت .. وصابر
الجرح وسط القلب والدمع بالعين
والوضـــــع ماتغيّر مثل مانت خابر
ياقربنا بالحـــــــيل .. لكــن بعيدين
بدروبنا ضاقت .. جميع المعابـــــر
مانلتقي مــــــع بعض .. إلا بثنتين
في قاعة الافــــــراح وإلا المقابر !!
مدري؟!
مـدري وراني اليا من ضقت من حـالي
واستاحــش القــلب والأيــام مصفــرّة
مدري وراك انت من يطــري على بالي
كنـك سحـــاب ٍ من الله يتبـع الجِـــرّه
ان قلت : غالـــي فلا تكفيك ياغــــالي
وان قلت وافــي فأنا قصّـرت بالمـــرّة
من كثـر قـربك لنفسي كنّك ظـــــلالي
واحسّك اقـرب من ظلالي مية مــرّه
ايام الثابت
معروف بالهـــرج معلم
لازارك مــن قبل يسلم
يبحث بعيونه عن حاجة
لو يفقدها ظــــل مبلّم
دوام الهاتــــــف بيدينه
لارقامـــه تلقاه مــــولم
يقعد ساعات طـــــويلة
وهو في مجلسك يكلّم
ابها
من زار ربوعــــــــك يتوب
عن غيرك من مدن وريف
يجـي لك ملبوسه ثــــوب
عاشق ارضه ماهــو ضيف
فيك الامير المحبــــــوب
جهــوده فـــوق التوصيف
من شاهد حسن الجنوب
يزهـــد في لندن وجنيف
مواعيدي
مواعيد البشر غيري لها جدول لها إستئذان
وانا ثارت مواعيدي على التقنين والآلة
تعيش بداعي الواجب ولاتغضب من النسيان
مدام ان الوعد حاله .. ردود الفعل له حالة
مواعيدي طبيعية تصارع قسوة الإنسان
رداة الفال بالإنسان .. ماخلته في فاله
اذا تأخرت عن وعدك خيانة لو يقولوا خان
قدرنا نجزأ الإنسان .. حرام نقسم إعماله
المرأة
للمرأة بالغـــــرب حكاية
معــــروفة رغــم الدعاية
مــــــدوا له حبل الحرية
والغوا مفهـــــوم الرعاية
المرأة الغربية تاهـــــت
خدعها القانـــــون التاية
والمرأة بالقطر المسلم
خلتها العقيــــــدة آيـــة
الخايب
مالي خلق الشخص الخايب
لوشفته ... اعتبره غايـــــب
احس افعاله مهـــــــــزوزة
وجـــــدار الشخصية عـايب
اثنين حـــــلوا في مجلس
وبانفسهم حـــلّت مصـايب
إيديهــــــم كنه مقطــــوعة
لوكان اللـــــي يسلم شايب!
العاب ورقية
جانا الطلب ومنـــــــــــول عايفينه
وصار الهليمة يالربـــــع لعبة فـــن
كــــــــوم الورق ياكثرها فــي يدينه
وتلقاه لابايت تقل داخـــــله جـــن
وين البلــــــــوت وكلكــم عارافينه
اربعمية ياماحلاهـــــــن الى جـــن
يثبت به الى ماتــراجـــــــــع يمينه
اشكل دبل خمسين مية حكم صن
الكفاءة
قال ان اخذت الكفاءة
الهدية عند ابــــــــوك
ولما نجــــح ابنه فعلا
قال له ياوليدي مبروك
هــــــــــديتي لك سيارة
تبغى كابرس وإلا بيوك
وبـدا طــــريق المشاكل
طـــــويل ومليان شـوك
يارب الانام
طالبك ... يارب الأنـــام
ياللـــي دخيلك مايضام
إنك تعــــــز المسلمين
وتكفينا شــــر الانقسام
واجعل جميع اوطانهـم
خير ورخا وامن وسلام
وانا طلبتك خـــــــــالقي
العفو مـع حسن الختام
إثارة
الرياضـــــة عنـــــدنا صارت إثارة
والإثارة عندنا راحـــــت بعيـــــد
ذا يثـــــــور وذاك متمسك بثاره
والصحافة جايعة هل من مزيد؟
والبرامــــج بالفضا غارة .. وغارة
لجلجه وهياط وصــــــراخ شديد
الإثــــــارة عنـــــــدنا تارة .. وتارة
الـــــزبد واجـــــد ويا قـل المفيد
الشكر
الشكر للنعمة علامـــة هــــل الخير
شكر الولي دايـــــــم طـريق السلامة
كــم نعمة ٍ زالت مـــن اسباب تبذير
وتحــــــوّلت بعــــــد السعادة ندامة
واذا شبعت اعرف ترى الجوع بالغير
يفتك بشعــب ٍ مايحصّـــــل طعامـــه
في كــل يوم يمــــوت منهم طـــوابير
الجــــــــوع عضــه لين يبست عظامه
الشتاء
بين الشتاء والبرد والشوق والليل
وريــــح الحطب والبن قصة طويلة
والبــوح والخـــــلان والبر والسيل
وقصايــــــــد ٍ تروي كبــــود ٍ عليله
ورجال يحـيون السهــــــر بالتعاليل
كل ٍ يجيب مــــن السوالف حصيله
فصل الشتاء معشوق كل الرجاجيل
يزهـــــــر نهاره واجمل البـــوح ليله
بلا عرس
في بيت ابــوها عايشة في كــــــرامة
حتى اكملت تعليمها واستوى الغرس
نالت شهادتــــــــها وباقــــــي امــــلها
عن فارس الاحـــلام تعرف مئة درس
بـــه كـــــل ماتهــــــــوى الفتاة وتمنى
لكن ابــــوها بالطمع تعـــــرفه شرس
لما تقـــــــدم له سأل عــن رصيــــده
قال المحبة .. قال إقعــد بلا عـرس!!
إبتعاد
إبتعادي عنك لاتظنه هــــــروب
كيف بهرب عن هــواك بلاسبب
لوتباعــــــدنا تقـــــــربنا القلوب
عمر إحساس المشاعر ماكذب
في هــــوانا تجتمع كل الدروب
نلتقي مانحس للرحــــــلة تعب
ياحبيب ٍ ماخـــــبرنا به عيــــوب
فارق ٍ بالزيـــــن عن كل العــرب
طفسه!
اركـــــد ويالهـــون يالغادي
اشــــوف انا حالتك عفسه
فيك الحــزن للمــــلا بادي
ومن ناقشك صابته رفسه!
قال السبب .. لعبنا العادي
فــــــريقنا ... صاير ٍ طفسه
ماظنتي .. يفتخـــــــــر نادي
فــي واحــــــد ٍ شينة نفسه
كنوز الجاهل
كـــم واحـــــــــد ٍ ينثر علينا كنوزه
يملا القصيدة بالصــــــور ماتعـوزه
اسلاك قلبي مــــــن سبايبك ذابت
وراح الغلا من يوم حرقت "فيوزه"!
يابوخــــــــــدود ٍ كنها نـــــور لمبه!
ويابوجبين بالحـــــــ،لا تقل "موزه"!
قصايـــــــــد ٍ تنشر ونقــــرا بعضها
يظنها الجاهـــــــل طـــــريق لبروزه
الفحص الدوري
عندي موتـــــــــر مابه بــــوري
ويشكي من ضعف الماطوري!
والبــــــدي مصــــدّم ومهشم
وبالليل اشبّـــــــك بالنـــوري!
حـــــتى صحيت مــــن الغفلة
كيـف اهمل شي ٍ ضــــــروري
ادخلت المـــــــــــوتر للورشة
واخضعته للفـــــحص الدوري
القشور
الجــــــدل لاصار ببليا فــــــــوايد
وفي محيط الذات مضمونه يدور
لوعناوينه زهت بـ احلى القــــلايد
وحاولوا تجــــميل وإبراز السطور
لو تزخرف في صدر بعض الجرايد
والإثارة حـــــاولت طمس الفـــتور
مايصــــــير إبداع..والابداع كايـــد
اغلب الصفحات تمــــلى بالقشور
عنتر
بعض الشباب اليوم خامل وقاتر
تشوف ركضـــه في امـــور ٍ توافه
في مــــــــوترة عنتر وربعه عناتر
يقـــــوم شعرك لاقرص له ولافه
ويضيق صدره لاذكــــرت الدفاتر
وان جيت تنصح قال هذي لقافه
مع شلته كل الحــــــكي بالمواتر
والتربية تذبـــــــــل بليا ثقـــــافة
نظرة حب
إكشفي للكـــــون عن اجمل حكاية
وضحي في صدق عن طهر الضمير
نعشق الاخلاص مـــن دون الدعاية
والنقا .. والطهــــــــر له معنى كبير
صـــادق الاحساس تكشفه البــداية
ونكتفي بالصمت عـن هـــرج ٍ كثير
كـــل شي تحس له حــــــــد ونهاية
غير نظرة حـــــب من طفل ٍ صغير
.
.
على الحب نلتقي دائما✋🏻🌹
.
تعليقات
إرسال تعليق