(نوافذ) إصدار جديد يضم بعض القصائد الاجتماعيةالقديمة للشاعر احمد الناصر الأحمد
(نوافذ) إصدار جديد يضم مجموعة من القصائد الإجتماعية القديمة التي كتبها الشاعر احمد الناصر الأحمد في البدايات ونشرها في الصحافة في الفترة (١٤٠١-١٤١١)هـ
.
.
(انااهبك بس يبغى هلاوة)
والله صحيح اللي سمعنا بالامثال
جــــــرحك قبل يـوذيك بادر وداوه
كل مشكلة تظهــــر لها الف حـلّال
عند الرجـال اهـل الفطن والنقاوة
وفيه مشكله ببيوتنا همّــــها طــال
وبانت نتيجتها وهــي بالطــــــــراوة
جبنا الخدم انواع واصناف واشكال
ندفــــــــع لهم راتب ونمنــح عـلاوة
وللخـــــادمة قمنا بتسليم الاطفـال
والعــــــــذر واهي مانطيق الشقاوة
وصارت لهم أم ٍ وصـــــــرنا بلا عيال
والشوف قل وكـــــن حاصل عداوة
الام مشغوله وابوهــــــــم له اعمال
والاجنبية .. تستغـــــل الغـــــــباوة
ونسينا ان التربية ضــــــــد الاهمال
ولامن بغيت ابنك يســـــرّك فخاوه
وســـــرت لغتها بين اولاد جــــهّال
وافـــــــكارها واحـــنا علينا غشاوة
وشفنا النتيجة نسمع الطفل لاقال
انا"اهـــــبك"بس يبغى "هـــــــلاوة"
اطفالكم ياناس ضاعــــوا بـ هالحال
مابين مانيــــــلا .. ومابين جـــاوة!
.
.
(دمها الطاهر على مريولها)
تدفع الخطوات في درب الاماني
وتنشر الإسعـــــــاد للي حــــولها
مــــــع حقيبتها تناجيها بـ اغـاني
حافظتها كـــــل يـــــوم تقــــولها
عارفه هالــــدرب مابه درب ثاني
سكته عامين تعـــــــرف طــولها
تحمل دروسه ومــن ثقله تعاني
شنطته دايـــــــــــم تخفّي زولها
بالبراءة جامعة كــــــل المعاني
والطفولة واضـــــــــح ٍ مدلولها
عايشة مابين احضان الحـــــنان ِ
اجمل الالفاظ هــــي محصولها
من شقا الاطفال فيها الاتــزاني
وردة ٍ يمحى الحــــزن مفعولها
الهنا لاجت شمل كــــل المكان ِ
مايمل الهـــــرج من سمعوا لها
مثل طيــــر ٍ صف ريشه ثم زاني
واطلق التغريـــــد وسط حقولها
وانتهض يبغى يطيـــــر بلا تواني
وسمع بارود ٍ وصل مرســـــولها
وانتهى وهي انتهت هذا الزماني
حكمة الله كـــــــــل نفس تنولها
صابها مجـــــــنون قبل الامتحان ِ
وداس وردة فل بـ احلى فصولها
وفارفت دنيا بها زيــــــف وهواني
نجمة ٍ غابت بوقـــــــــت إحلولها
وخلفت ذكراه مـع اجمل معاني
وكلمة ٍ ماتت قبل ماتقــــــــولها
واللعب وثياب مـع بعض الاواني
ودمها الطاهــــــــر على مريولها
.
.
(طفلة معاقة)
طفله جـــــماله نادر ٍ بين الاطفـــــال
تاســـــر بضحكتها ويبهــــــــر خجلها
تخفي عــــــــذابات بريئة بالآمـــــــال
عــــــــذروبها للـــــــي جهلها كسلها
نظراتها تركــــــــض ورا العم والخال
كنّه تــــــــدوّر شي مـــــن غير اهلها
تطلق فـــــــــراشات اسئلتها وتحتال
تبغى الإجـــــــــــابة ليه يافلان شلها؟
تكبــــــــر ولازالت اسيرة لهالحــــال
تزيــــــــــد حيرتها وينقص جهـــــلها
يفــــــــز قلبه كــــــل ماشافت ازوال
كنه تــــــــــدور بينهم عــــــــن املها
في كل يوم تعيش في نفس الاشكال
تقفـــز على الحيـــــــرة وتنثر عسلها
لما عــــرفت عن وضعها دمعها سال
هي طاهـــــرة والدمع فاض وغسلها
وللواحـــــد المعبــــــود علّام الآجال
اللـــــي خلقها بالوجـــــــــود وكفلها
توجهت له بالدعــــــاء وخير الاعمال
ماهــي كبيرة واخلصت فـــي عملها
طفلة معاقة مـــــــدّت لــــربها حبال
يارب ساعــــدها وهـــــــــوّن شللها
.
.
(ابن الوطن)
شفت الخطاء في موقف ٍ من سبب ثور
كتمت غيضي والتزمــــت بحـــــــدودي
كنت بعيادة جالس ٍ انطـــــــــر الــــدور
وسمعت كلمة .. جعلها ماتعـــــــــودي
شخص ٍ ينادي شخص ويقول"منصـور"
لاتنتظر هــــــــذا طبيب ٍ سعــــــــودي
راحـــــــوا وانا اغلي مــــن الهم مقهور
والصـــــــوت بذني له دوي الرعــــودي
ياجاهـــــــل ٍ حكمك بنيته على الــزور
ليل الجــــــهل ضارب عليك القيــودي
افــــــــكارك الميتة تغطت عــــن النور
وعند العـــــــمى مافيه بيض ٍ وسودي
اليوم ببلادي غــــــــدا العلم مشــــهور
والحمـــــــد لله كل يــــــــوم ٍ بــزودي
في كـــــــل مستشفى ممرض ودكتور
مــــــن ارضنا مخلص عطوف ٍ ودودي
حتى الفضا بالعلــــم جهـــــــز له نسور
ويقــــــــود اضخــــــم طائراته سعودي
ابن الوطــــن من فضل مولاي مشهور
حــــــب الوطـــــــن عنده اهم البنودي
العلـــــــم قــــــــدامه مسهل وميسور
غطت مـــــــدارسنا الجبل والنفـــودي
بالمملكة .. كــــــــــلّ ٍ يشارك وله دور
فــــي نهضة ٍ فاقت جميع الحـــــدودي
الشعب..كل الشعب فرحــــان مسرور
يشكـــــر ويدعـــــــي خالقه بالسجودي
إنه يديــــــــم الفهــــــــد عالي ومتصور
واخـــــــــوانه اللي باذلين الجهــــودي
.
.
(غباء)
سخف وغباء مدري سذاجه وتخريف
افعال تخجــــــــــل تاصفه في عبارة
وين الحضارة؟ مااخذنا سوى الليف
ياسرعنا نركـــــــــض لزيف الحضارة
نركض وراها ركضة البــــدو للضيف
فيها التفاخــــــــــــر بيننا والشطارة
مـــن دون تفكير نتسابق على الزيف
سراب يخــــــــــدعنا بحسن النظارة
نستقبله بالكـــــــم مانعـــرف الكيف
هــــذا التقـــــــــــدم عندنا ياخسارة
وين التقـــــدم والرقي؟ مابعد شيف
عادت طيور الصيــــــد..والصيد فاره
عن وضع بعض الناس محتاج تعريف
اكبر حــــــــريقة مبتداها شـــــــرارة
بعض الشباب اليوم صاروا مـــلاقيف
لاجبت له موضـــــــة عطاك البشارة
وبعض الاسر مع الاسف تقبل الحيف
وماينهدم بالهـــــــــون يصعب عمارة
لون الذهـــــــب لو زان يدخله تزييف
حـــــــذرى قبــول الشي قبل إختباره
ياللاسف كم بنت حلـــــــوة تواصيف
قــــــل الحـــــيا عنده وقـــل إعتباره
تركـــــــب مــع السايق بلا اي تكليف
ضحــــــك وسوالف بين حارة وحارة
مستانسه بالحــــيل مبسوطة الكيف
طــــــــول النهار التمشية والـــــزيارة
سيارة ٍ فيها مسجــــــــــــل وتكييف
والاب آخــــــــر مايفكـــــــــــر بداره
المشكلة اكبر من الوصـــف وتخيف
ولجل الوطـــــــن لمحت له بالاشارة
كان التجـــــارة تخلط شباط بالصيف
مـــــرفوض ابو شي ٍ يسمى التجــارة
.
.
(ثور النفيعة)!!
نفـــــج عيــــــونه وانتفش كنه الطير
وقـــرّب وقال الفـــــــن عندي طبيعة
وش بالجريدة؟ قلت مابه سوى الخير
قالت انت ليه ابطيت وش بالــربيعة؟!
قلت الرســــــــم يثــــر مثل اي تعبير
مـــــن رقصة الفرشاة تصنع خـــديعة
ترى الرســــــــم ذوق ٍ وفــــن ٍ وتأثير
ماتشوف هالـــــــرسمة حقيقة بديعة
قام وفــــــرك راسه وعــــض الاظافير
وضاقت عيـــــون ٍ قبل مـــدة وسيعة
وبدى يهمهم بالحـــــــكي تقل تصفير
ونطـــــــق بكلمة قال والله قطيــــعة
هالخـــــربطة كله شخـــــوط ودواوير
ضيّعت مـــــن وقـــــتك عليها سويعه
قلت تسمــح تفارق وتمشي على خير
صحيح لوسمّـــــوك ثـــــــور النفيعة!
.
.
(مرسي حبيبي)
ابني صغيـــــــــــر وكل همــــــــي اربيه
وازرع به اخــــــــــلاق ٍ اصيله وراعــــيه
وافـــــــــــــــرح الى شفته ونادان "بابا"
ويقـــــول حاضـــــــــــر لاسمعني اناديه
لكــــــــن قبل مــــــــدّة تغيّـــر خسارة
واصبح يقول الهـــــــرج واجهل معانيه
لاسمع صـــــــــوتي قال "مرسي حبيبي"
حتى المشي اصبــــــح تقل رقص باليه!
واصبح يسمي كل حـــــــــرمة بـ "نينا"
وراع البقالة بإســــــم "الاسطى" يناديه
واسم الغرف اصبح "اوض" في لسانه
والانسة واسمى "التمــــــرجي" يباريه
مرّة دخــــــل مسرع وقال بمـــــــرارة
"رقـــل" يعيط مين يعــــــرف بكم ليه؟
قلنا مانعـــــرف قال "مافيش حـــــاقه"
اصله "بيشحت" وانســـــرق منه جنيه!
كـــــــــلام واجــــــــــد اسمعه واتحسّر
ومن كثر ماسمع يعجز الشعر يحصيه
اما السبب لاشــــــك انك عـــــــــرفته
ويكقي ذكـــــــاء القاري فلاني مسميه
.
.
(عجايب)
الخــــــــــداع وكــــــــل تزييف ٍ يذوب
وينكشف ماكــــــــان تخفيه القلـــوب
الحقيقة شمس ماتمــــــــل الظهـــور
لوحجبها الليـــل فــــي وقت الغــروب
رددوا بالغـــــــرب معسول الكــــــــلام
هل كـــــلام الغــــرب معناه الوجوب؟
حققوا لشعـــوبهم كــــــــل المــطالب
واقطعوا عـــن غيرهم كــــــل الدروب
واقطعوا بالسر شــــــريان العـــــــدالة
وابدلوها جهــــــر في بنت ٍ لعـــــــوب
واصبح الغـــــــربي يهيم بحـــب نفسه
يحـــــرق الدنيا مادام انه طـــــــــروب
يشكي التخمة وهــــــو يشوف الجياع
ويرقص الديسكو على صراخ الشعوب
ويدّعــــــــي إنه تربّــــــــع بالحضـــــارة
واسعد العالــــــــم وهو والله كــذوب
يحتفظ باللب ويصـــــــــدر قشـــــوره
ويرمي العالــــــــــم بأحجار ٍ وطــــوب
في جنــــــــوب افريقيا مليـــون طفلة
تصــــــرخ من الجوع تركض دون ثوب
في سماء افريقيا مليـــــون صــــــرخة
تطلب النجــــــدة من اهوال الخطوب
في تــــــــراب افريقيا مليــــــــون جثة
كـــان ينقـــــــذها ولو ماء بكــــــــــوب
وآسيا تبكــــــــي وفي شـــــــرقه مآسي
الحجــــــــــر مـــــن شد ماعانت يذوب
كــــم طفـــل بالشرق يبكي لاجل خبزة
وكـــــم طفل بالغــرب ينثر كاس روب؟!
بعد هـــــــذا كيف تطرون العــــــــدالة؟
وتتركـــــــون اسمه على السنكم يجوب
واخترعتوا للعسل مليــــــــون صــــورة
وفيه اوادم مالقت حـــتى الحـــــــــبوب
لو بذلتوا بس مـــن اجـــــــــل السعادة
ربــــــــع مايبذل على شان الحــــــروب
كـــــــل شعب ٍ عاش راضــــــي ومتهني
وضحكة الاطفال تشمل كــل صـــــوب
آه يامــــــــــــــولاي بالدنيا عجــــــــايب
قلت الخيـــــــــرات من كثر الذنـــــوب
.
.
(يمّه)
قصيدة تخيلية قديمة على لسان فتاة تعاني من قسوة تعامل امها معها.
.
يمّه وش اللي صــــــــــار بينك وبيني؟
ليه العــــــداوة بيننا داخــــــل البيت
مااخطيت انا واياك يانــــــــــــور عيني
من شب نار الحقـــد من حط له زيت
يمـــــه جهات الكــــــــــون ماتحتويني
مليت حـــــــتى عـــــن حياتي تخلّيت
باول شبابــــــــــــي والشقاء يحتريني
كـــني انا واياه اخـــــــــــوة بها البيت
اعيش مـــــــــع ناس ٍ وهــــي ماتبيني
مليت من ظلم الاهــــل صدق مليت
يمــــــــــــه انا بنتك ... وباول سنيني
انزف شقاء ودمــــوع صوتي تناهيت
يمـــــــــــه اذا بك رحمة ٍ فـ ارحميني
عانيت مـــــــن قسوة تعاملك عانيت
مانـــــــــي عـــــــدوه لك فلا تقهريني
ومانـــــــي ذليلة بس منك استذليت
ومانـــــــــي غبية ..... منيتي تفهميني
اسكت ومـــن شانك قبلت وتغاضيت
ان جيت اسلـــــــــــــم ماقبلتي يميني
وان جيت اسولف يصبح الهرج تنكيت
وان جـــيت او ماجيت فالوضــع شيني
بنت ٍ فرحها ميت .. قلب امها ميت!!
( دموع القصايد)
ليه الحــــــــــزن بالشعـــــــر يكثر عياره
ليه القصايـــــــد كلها نـــــوح في نــــوح
ليه الاســى ليه الشقاء والمــــــــــرارة؟
ليه المشاعــــــــــر بالالم دايــــــم تفوح
ليه التشكي والبــــكاء والحـــــــــــرارة
ليه الشعـــر دايم من الحـــزن له روح؟
كل شاعـــــــــر ٍ ينظــــم وضـع باعتباره
ان الشعـــــر ماينظمه غير مذبـــــــوح
والشعـــر بحـــر ٍ واسع ٍ في قـــــــراره
فيه البكاء مسموح والضحك مسموح
فيه الـــدرر اشكـــــال .. فيه الإثــــــارة
لكــن يبي مركــــب ويغرق هل اللـــوح
الشعــــــر مثل الـــــــــورد فيه النظارة
ماهــوب شوك ٍ من دخـل فيه مجروح
شوفـوا الغــــــزل اكثر غــرض بالغزارة
كله هجــــر وفراق والصـوت مبحـــوح
فيه التوسل صــــار كنه طـــــــــــــرارة
مايجتمع بالحــــب خـــاين ومشفـــوح
ويصـــــــــور الاوضـــــــاع باشين عبارة
ويصيــــح وينادي حبيبه يقـــول "اوح"
إنــــي طــوال الليل ماسك خـــــــفارة
في سوقـــكم دايــــم معسكر ولااروح
مــــن يـــــوم حبيتك وعمـري خسارة
ومـن عرفتي لك دايم الثوب شرشوح!!
ياناس هـــــذا الحـــــب ماهـــــو عيارة
من قال ان الحـــب واقـــف ومطروح؟
فيه السعادة والهــــــــــنا .. وفيـه ناره
فيه الهجــــــر فعـلا وبه وصل ومزوح
هـــــذا الهـــــوى عملاق ماهـوب فاره
كــفّ ٍ بها البسمة وكـفّ ٍ بها النــــــوح
ضعف الهـــــوى منا وقـــــــــل إعتباره
وصار الهوى وحش ٍمن الطعن مسدوح
انااعــــــرف الحــــــــب هجـــــر وزيارة
اثنين تربطهم مشاعـــــــر مــــن الروح
تارة يكـــــــون الصــــــد .. والوصل تارة
حتى الخــــــطا مابينهم دوم مدمــــوح
مشاعـــــــــر ٍ ماتنوصف فــــــــي عبارة
احساس مايقـــــــــدر على وصفه البوح
الشـــــــرح واجــــــــد واكتفي بالاشارة
يكفــــــي سؤالا باول القاف مطــــــروح
ليه الحــــــــزن بالشعـــــــــر يكثر عياره
ليه القصايـــــــد كلها نــوح في نـــــوح؟
كــــل يقــــــــــول الراي حسب إقتداره
ويوضــــــــح الاسباب والباب مفتـــــوح
.
.
(تكرار)
الشعــــــر مابه مشكلة يـ اهل الاشعار
المشكلة ناس ٍ علينا تعيـــــــــــــــــده
نفس الجُمل نفس الصور نفس الافكار
كــــــل القصايـــــــــد تشعر إنه قصيدة
تكـــــــرار؟ عمر الشعر ماصار تكـــــرار
نفــــــرح متى نلقى قصيدة جـــــــديدة
نحس له نكهة وبه عـــــمق واصـــــــرار
تطـــــــرب صورها والمعاني فــــــريدة
لون الزهـــــر فيها وبه عطـــــــر الازهار
لكــــــن بالابــــداع صارت وحيـــــــــدة
معقول مبنى الشعــــــر بالهـــــون ينهار
وحنا نقـــــــول الفاس مـــــن صار بيده
معقول يـاهل الشعر نسكت على صغار
قصايــــــــــد ٍ تجمـــــــــع بجملة مفيدة
مــــن منطق التشجيع نمناعلى اعــذار
اشخاص تخطـــــــي فـــي قراءة نشيدة
باسم المواهــــــب نصفنا صــــــار شعار
وكــــــــلّ ٍ على نهجه لقى له جـــــريدة
كل الفنـــــــــون مشيّد حــــــولها اسوار
وتعـــــــــرف بداية المحـــــــــب وتفيده
ان شافته موهـــــــــوب شبت له انـــوار
وقــــــــدام مـــــن لايحتــــــرمها عنيدة
رســـــــــم ٍ وقصة .. مسرحيات بـ ادوار
هــــــذي الفنـــــــــون بقاعدتها العتيدة
الفــــــــــن لو ينظـــــــم لحمــــاه مليار
مايرفض الانسان فـــــــــــن ٍ يجيــــــده
الطيــــــــر لو حام الشجــــــــر كلها طار
وفي غير عشه يقــــــدر الشخص صيده
ارجــــــــع واكـرر .. موضة الشعر تكرار
عساه تنفع مـــــــع عـــــواطف بليـــــدة
هل هو خطا حـــرصي على لفت الانظار
ودي نشوف الشعــــــــر في يوم عيـــده
والا الجــــــرايد تنشر مـــــرار .. ومــرار
وفخر المحــــــــرر صار كثرة بريــــــده!
.
.
(شلة السهرات)
.
اكتبي بالدمــع عن قصة همومك
عن لظى الحــرمان ودموع القهر
وضحي شكواك من يقدر يلومك
تكبر الوحـدة على اعصاب البشر
لوتحملتي غيابه طـــــــــول يومك
لويغيب الـزوج عـــــــن بيته شهر
شلة السهرات من اكبر خصومك
غلطة الازواج بدمـــان السهــــــر
(ذكرى وعبرة)
سهرت اللـيل في عــــــد النجومي
أناجيـــها وكاشفـــــها بهمـــــــومي
وصــارحها بكــــــل اللـــــي بقلبي
وهــــي للسـر صنـدوق ٍ كتــــومي
حضـــــــــارات عظيـــمة كيف زالت
تمـــوت الناس والطيّــب يــــدومي
بقـــى منها لنا ذكـــــــــــرى وعبرة
وعـــلم ٍ يعتبر اســـمى العــــلومي
عطتـــــنا مــــــن تجاربـــهم فـــوايد
وكــم من فـــرد خلـّـد ذكـر قومـي
عرفــــنا كيف اجــــــــــداد اشاوس
تخوض الحـرب ماتهاب الخصومي
بحــدا الكفـــين تسـعى للمعــارف
وكــّف ٍ للعــدا.. دايــــم لطــــومي
عرفــنا كيــف ســادوا بالعــــــدالة
علــوا فيها على فــــرس ٍ ورومــي
وادركـــنا مفاهـــيم الشجــــــــاعة
وانــه واجـــب ٍ للفـــــــرد يومــــي
قريـــنا بالشـــعر مليـــــون صــوره
ولكـــن اغلبــــه شامـــل عمــومي
(ابوتمــام) اجمـــل مــــــن رسمها
يكــــاد الحـــــرف بالأبـــداع يومـي
و(احمــد)*عبقـــري الحـرف وضّح
صــدى الأفــراح وصـراخ الكلـومي
يركّـــب من احاسيـــسه حــــروفه يصــــوّر كــل فايــــز ومهــــزومي
جمــــع بالشــــعر الــــوان البلاغة
جعــــل للحــرف الــوان ورسومي
مـــدح بالشـــعر احـــرار المعارك
ووضّــح قـــدر غربـــان وبــــــومي
(اباالطيّــب)يمـــوت الشـــعر فعلا
ولكن شاعــــر ٍ مثـــلك يــــدومي
قصيـــــــدك باقـــي فينا وخالـــــد
تدوم الشمــــس وتزول الغيــومي
ابختــــم هالقصيــــدة في قصيدة وبذكر مطلـــعه لاهل الفهـــــومي
( اذا غامــــرت في شــرف ٍ مروم ِ
فلا تقنـــــع بمــا دون النجـــــومِ )
.
.
قبل الختام
مافيه نار ٍ تشتعل دون دخــــــان
ومافيه مسجد مااعتلت به منارة
والماء جعله الله لتطهير الابـدان
واذا تعـــــذّر فالتيمم طهـــــــارة
.
ختاما
كنتم مع مجموعة من قصائد البدايات للشاعر احمد الناصر الأحمد الخاصة في الشان الإجتماعي والتي تم نشرها في عدد من الصحف السعودية في الفترة من ١٤٠١ حتى ١٤١١هـ .
القصائد الإجتماعية الحديثة والرباعيات والمقطوعات الشعرية متوزعة في إصدارات سابقة🌹
.
.
إصدارات سابقة
قصائد ذاتية ووجدانية
- الأسوار
- مطر وعطر
.
قصائد تراثية
- حديث الطين
.
مقطوعات منوعة
- احمديات . الجزء الأول
- احمديات . الجزء الثاني
.
رباعيات منوعة
- رباعيات شعبية
.
قصائد رياضية
- قلائد عشق . الجزء الأول
- قلائد عشق . الجزء الثاني
.
قصائد في مدينة بريدة
- بريدة
.
قصائد خاصة بالشتاء
- شتويات الأحمد
.
قصائد كُتبت في الشاعر الأحمد
- اولئك اصحابي
.
كتابات ادبية نشرت في جريدة الجزيرة
- إمتداد . الجزء الأول
- إمتداد . الجزء الثاني
.
جميع هذه الإصدارات تجدونها في :
.
- مدونة احمد الناصر الأحمد في جوجل
- قناة الأسوار في التلجرام
- حساب الشاعر الأحمد في تطبيق إكس
.
تعليقات
إرسال تعليق