(( قلائد عشق )) الجزء الثاني . احمد الناصر الأحمد
( قلائد عشق . الجزء الثاني )
قصائد كتبها احمد الناصر الأحمد
في نادي الرائد
من ١٤٣٧ - ١٤٤٧هـ
بسم الله الرحمن الرحيم
وفاء لمن يستحق
حنا مع الرائـــــد على العسر واللين
عهــــد علينا مانسيبك لحـــــــــالك
صحيح ماحنّا عن الوضـــــع راضين
نشعر بحــزنك ..ضيقتك وإنخذالك
لكــــــننا من زود حبـــــــك وفيين
نحضر.. نشجع .. ياعسى الفوز فالك
ابتدى الدوري
ابتدى الـدوري وعــدنا للإثارة
التنافس غير .. والدوري مثير
النـــوادي ..كلها فـن ومهـارة
لكـــن الرائـــد بعيني شي غير
ثالث خماسية
اللي حصل اجمـل من افـــلام الخيال
فانتازيا .. لقطات اكشـــــن مـــــــرعبة
الشوط الاول قـــــول مــرسوم بجمال
خطط له الجـــــــــوكر بفـــــــن وركبه
وفـي ثاني الاشــــواط فـــوق الإحتمال
احـــــــداث صعب ان العقل يستوعبه
جابـــــــوا ثلاثة وابتــــــــدوا بالإحتفال
وقال الحمــــــر فــــرحتك بله وإشربه
ومـــــن بعد كـــر وفــر تصميم وقتال
الرائــــــــــد المجــــنون سوى شقلبه!
ثاني وثالث .. رابــــــع ٍ هــــــذا محال
الفـــــــن فنه .. والتحــــــــدي ملعبه
ومع خامس الاهداف ذاب الخصم زال
اصبـــــــح عجــــــاج ٍ تلمحه ماتقضبه
ثالث خماسية يسطـرها الرجـــــــــال
تاريــــــــخ .. والتاريخ مااحــــد يكذّبه
.
رد ابوعبدالله ابراهيم الراشد رحمه الله على القصيدة👇🏻
مايجي عقــب احمد الناصر كلام
شاعــــــــر الرايـــد .. وحنا نتبعه
أشهدانه فـــــــــي كلامـــه مايلام
الحمــــــــر فــي دمنا يمشي معه
(احمر"واسود مع أبيض كالغمام)
سجـــــل الخمسه نهار المعمعة
ابتسم وأرفـــــع عن الوجه اللثام
عــــــدد الخمسة ابصوتك نسمعه
وان كتبها الله مـــع مسك الختام
نتبعه .... ابفيصـــــــلي المجمعة
مانترك الرائد وحيد
ياصاحبي الغالي ولــو
جميع اصحابي سلـو
مانترك الرائد وحــيد
لو كان فـي دوري يلو
حنا معه وقت النزول
وحنا معه وقت العلو
.
حزن اليتيم
كثر الهزايــــــــم ضيّقت صـدر الحليم
وريـح الألم والحـــــــزن طفّت شمعته
نحزن على الرائد مثل حــــــزن اليتيم
اللي نهار العــــــــــيد .. فاضت دمعته
حسبي على اللي عاث في فخر القصيم
عانــــــد جماهـــــيره ..وضيّـع سمعته
.
بكل أسف
كــل الفــــرق تقدّمت بالمــــــــراكز
بدت من الواحــد لما وصلت الألف
الناس تركـــض والحــــمر بالمعاكز
يسحب رجوله والهواء ناطحه صلف
الرائد اللـي باخــر الركــــــب راكـــز
الناس تتقدم وهــو يرجــــع لـ خلف
.
زعيم المنطقة
ماعاد باقي للفــرح بقلوب عشاقك وجـــود
من عقب مامات الشغف بقلوبهم مات الفرح
وش به زعيم المنطقة هل صابته عين الحسود؟
نادي التحدي والشموخ والعشق وشلون إنجرح؟
متى يعــود الرائد التايه .. متى لـ اهله يعـــود؟
ويعــود جمــهور التحـدي للسعادة والمــرح
.
كيان شامخ
ماعاد للكــــورة طعـم
هذا ربـــح..هذا خسر
المسألة ماهي دعـــم
الوضــع فعـــلاً مايسر
حزين لـ الرائد؟.. نعم
كيان شامخ وإنكسر!!
.
متى تعود؟
يا رائــــــد عشقه سكنّا من زمــــان
مافيه غيـــرك يـ الحــــــمر محبوبنا
متى معك نفـــــرح ونشعر بـ الامــان
متى تزيــــــن علــــــومنا ودروبنا ؟؟
متى تعـــود لهيبتك يـ اعظـم كيان؟!
حنا شمـــــوخك رفعتك مطلـــــوبنا
وين التحــــــدي مختفي والعنفـوان
وش فيه ثــوبك مختلف عــن ثـــوبنا
متى تعـــــــــود ويبتهج فيك المكان
دامـك سكنت عقـــــــولنا وقلـــوبنا
الموقف الصعب
انا اشهد إنك رائـــــــد ٍ بالتحـــــــــدي
وانا اشهد إنك تعشق الموقف الصعب
يتبعك جمهــــــــور ٍ حشى مايعـــــدي
من كثرهم مااقول جمهـور..ذا شعب
تسعة اعشار القصيم
نحزن على الرائد مثل حـــزن اليتيم
اللي نهار العيــــد .. هاضت عبــــرته
عنــد الهزيـــمة كل عاشــق يستضيم
ويضيــق صـــــــدره كان طالت عثرته
وان فاز فرحوا تسعة اعشار القصيم
وتنسج بريـــدة ثـــوبــها من حمرته
.
نداء
نادكم الشهـــــم يالحمهور
الريس الفــــــــــــذ ناداكم
يوم الثلاثاء نريـــــد حضور
يملا المـــــدرج .. وحياكم
ومن بعدها فرحة ٍ وسرور
بالفــوز .. لاخاب مسعاكم
.
لافاز رايدنا
لافاز رايــــــــدنا .. تزيـــن التعاليل
نضحـــك نسولف ننبسط ونتمشى
وإذا انهزم ضاقت صدور الرجاجيل
ننام مـــــن بـــدري قبل ماانتعشى !
جمهورنا
جمهورنا يافخـــــــرنا .. حان دورك
حب الحمـــر بقلوبكم .. نابت نبت
باذن الله الفـرحة تجي مع حضورك
جهــز أهازيجك .. ترى قرّب السبت
فوز الحمر مصدر فرحــك وسرورك
مالك عــــذر كانك تأخرت .. اوغبت
.
مغرور يالرائد
عاد المــــــدرج يشتعل في حضورك
وعادت لك احباب ٍ وعادت لك افراح
مغــــــــرور يالرائد .. ويطرب غرورك
مستقبلك مبهــــــــر .. ويازين ماراح
اخذت مـن نخـــــــل التحدي بذورك
وزرعتها بنفـــــــوس عشّاق .. وارواح
موعدكم الأثنين
موعــــــــدكم الاثنين يانبض الكيان
عشاق الاحمـــر دايـــم انتم مفخرة
حضوركم واجــــب وصمام الامـــان
مــن يدعــــم الرائد ويحضر نشكره
في موقعة ابها يجب نمــــلا المكان
ومن غاب عن هاليوم صعب نعذره
ملينا الصبر
كسر الحمـر وشلون نلقى له جبر
الــــورد ماينبت بـ الارض الممحلة
حنا صـــــبرنا لين ملينا الصــــــبر
وطال التعب وإحنا نحسبه مرحلة
حب قديم
حــزني على الرائد مثل حزن اليتيم
اللي نهار العيــــــــــد فاضت دمعته
متروك لـ احــزانه وحيــد ٍ يستضيم
من بعد ماهــــو شامخ ٍ في جمعته
اللى بقى ذكـــــــراه مع حب ٍ قديم
مع عشق جمهـوره وماضي سمعته
سليمان العضاض
كل المــــراجل بإختصار
تزهاك في طول المسار
مثلك .. يابــوخـالد قليل
جمعت حكـمة مـع وقار
واهديت كـل العاشقين
فــرحة وبسمة وإنتصـار
طول الإنتظار
مليت من صبري وطــــــول الإنتظار
ومن نزف جـرح ٍ كل ماطاب إنجرح
وتتابـــــــع الغلطات من دون إعتذار
من صاحب ٍ لامن بغى يجمع طــرح
امشي مـــع الرائد على نفس المسار
نبحث عن الفرحـــة ولا نلقى فــرح
الرائد الغالي
الرائـــــد الغالي .. وعشق الجماهير
لازم نلبـي دعـــــــــــوته .. لاتهـــاون
ونحضر على شانه جمـــوع وطـوابير
كل القلـــوب بعشق الاحمــر تساون
واجـــــب نلبي دعـــــــوته دون تأخير
ونكمل فـــرحنا لاهـــــزمنا التعاون
نسيانك صعب
حاولت نسيانك ولكــــــن ما قــــدرت
رغــــم الجفا والصــــد نسيانك صعب
كأنك الرائـــد وســـط قلبـي كبــــرت
وماشفت منك إلا التجاهل والتعب!!
كورونا
اشتقت يالرائد لصوت الجماهير
تشجيعهم .. لامن لعبت اطربونا
لاهــــزوا الملعب وجولك طوابير
رشوا اهازيج الفـرح .. واسعدونا
يارب تجمعنا على الحـب والخير
وتزيــــــح عنّا .. ياالهي كــــورونا
افضل جماهير
لوكان يوجد كاس لـ افضل جماهير
جمهور رائدنا خذوووه بجــــــدارة
تشجيعهم مثل الرعـــد والاعاصير
كم حققوا من فوز عقب الخسارة
لاوصلوا الملعب جمـــوع وطوابير
رشوا على كل الحضـــــــور الإثارة
تشجيعهم ماهوب فوضى وتصفير
تشجيعهم فــــــن وحماس ومهارة
تشجيعهم زلزال مــــن دون تدمير
لاهـــــــزوا الملعب تزيــد الحرارة
بين اجمل الالفاظ وافضــل تعابير
الصمت ماوقّــــــف عليهم قــطاره
تكفى
تكفا .. يابوبنـــــدر يكفيك ماراح
ابعــد عن الرائد وتكسب جماله
اعــوام مرت وانت بجهاد وكفاح
كل ماانتهت حاله .. دخلنا بحاله
انت تعبت كثير تبحث عن افراح
بس الفرح ماالله كتب لك مجاله
واليوم فينا تاهت حلول الاصلاح
والرائــد الغالي يزيــــــــد إعتلاله
ليتك يابوبندر تريّـــــــح .. وترتاح
وترجّـــــــع الشايب لمنزل إعياله
ارجوك إفعلها .. وانا اعرفك لمّاح
اعمل بنا معروف وإكسب جماله
.
.
قبل الختام:
يقول "حرف باذخ" احد المتابعين الجميلين في تطبيق ×
تستاهـل التـقديــــــر ياشاعـــــر الجيل
يالمبـــــدع المـلــــهم لك القـاف سـلّم
نشــــرب بيوتك مثل شـــرب الفناجيل
من يومـــها بـ "الشيّب" وإلا "المسـلمّ"
.
.
ختاما:
هذا ليس كل العشق .. وليست كل القلائد .. هذا ماتمكنت من جمعه .. اما مافقدت فالعوض من الله.
اتمنى ان يحوز هذا الجهد على رضاكم واستحسانكم وان يكون رافدا جيدا وإضافة جميلة للجزء الأول من
قلائد عشق
كما ادعو الله ان يعيد رائدنا قريبا لسكة الأمجاد محاطا بكل عشاقه ومحبيه.
تعليقات
إرسال تعليق