( اولئك اصحابي ) قصائد مهداة للشاعر احمد الناصر الأحمد
{{ اولئك اصحابي .. }}
مدخل:
هي قطرات من بحر الوفاء التي غمرني بها ثلة من الأصدقاء والزملاء النبلاء.
هي قلائد حب ووفاء طوقني بها احبة اعزاء بعضهم فارق دنيانا عليهم رحمة الله ..واطال الله في اعمار الأحياء .. اذكر من الراحلين على سبيل المثال لاالحصر. سليمان النقيدان. مساعد الرشيدي. عاقل الزيد. مسفر الدوسري. سعدان عابس الرشيدي .علي المفضي. نمرالسحيمي. منصور المشيقح. احمد البلوي. عبدالرحمن البطي متعب وضيف الله العتزي وغيرهم كثير رحمهم الله جميعا.
كمافقدت فيوض وفاء من قلوب الكثيرين اذكر منهم الأعزاء فهد السطامي.محمد المويعزي .محمد صلاح الحربي. ظاهر هلال . فهد الفوزان. شارخ الشارخ. محمد الزبن وغيرهم.
ماتقرؤونه هنا هي نبضات قلوب اصدقاء احبة نبلاء اسعدوني بمطر قلوبهم الوفية وربيع ارواحهم الزكية..وطبعوا على الروح وشوم وفاء لن تزول .. لهم ولكم خالص محبتي وشكري وتقديري.
نجم القصيم
للشاعر المعروف.راضي غالي الرشيدي
ياهجــــوسي حضّـــري واكتبي مني سلام
سالم ٍ من قلب مخلص ومن فكر سليم
قاصــــده للشاعــــــر اللي مواقيفه تمام
ياعسى مااسمع بيومه..عسى عمره مديم
لابــــوعادل مني ازكـــــــى تحـية وإحترام
كل ماناحــت حمامة وماهـــــب النسيم
احمد الناصر عـــــــزيز ٍ وله عــــزّة مقام
مثل حد السيف..والسيف حدّه مستقيم
كلمته..هــي كلمته مايتراجــــــع بالكلام
مـــن رجال ٍ بالوفاء شانهم..شان ٍ عظيم
اصلهم..اصل ٍ عــــــريق ورجاجيل حشام
من جهلهم يسأل اللي عرفهم من قديم
وكل حاسد نـــــــوره الله يبدله بظـــلام
وكل من مرّه وشافه يقــول الله كـــريم
اعتقد مـــــن سمعني مايلحقني مــــلام
مـن يلحقني ملامـــــــه تراه اكبر غشيم
وانت يااحمد شاعــر المعرفة والإهتمام
صاحــــب المعنى..وشعر ٍ بلامعنى عقيم
ينشرى معناك يـــــــوم المعاني ماتسام
إيه هذا الشعر..ياصاحب المعنى الحكيم
فوق يانجــم ٍ تشعشع رغم سمك الغمام
فوق يانجــــم القصايد..ويانجـــم القصيم
امدحك واشيل مدحك على صدري وسام
افتخرباسمك وقف له على العظم الصميم
ثم اسولف عنك لورحت شرق ورحت شام
الفت الاتظـــــــار لمتابعة شعـــــر ٍ وسيم
مانسيتك..مانسيتك..ونسيانك حـــــــرام
وانت وقفاتك معي مثل وقفات النديــــم
بيض الله وجـــــهك بكل يوم .. وكل عام
جعل مــــن جابك مكانه بجنات النعيــم
قلتها من صــــــدق مالي بها قصد ومرام
بس اقول الحــــــــق والله سبحانه عليم
والحقيقة كسر نظــــــــرة قليلين الرحام
اهــــــل النمة عساهم..عساهم للجحيم
يابوعادل لاعــدمتك وفيك العــــــــــز دام
ياعضيد اللي من الوقت الاقشر مستضيم
لك تحـــــــية طيبة فالبــــــــداية والختام
شيمة وقيمة واكــــرر واقول إنك خشيم
زعفران الروح
للشاعر الكبير . ابراهيم السمحان
اليـــــوم ياقلب الــــــوله للقاء غــــــــن
خــــــل اغنياتك ترتــــــدي ثــــوب ثاني
ارقــص بكل اعضاك واهتف وهيـــحن
واطــــــو الشراع اليوم .. يوم المــواني
هناك تلقى منبع الـــــــــذوق والفــــن
تلقى القصيـــــــــــد اشكالها والمعاني
احمد رفيق الــــدرب فضل ٍ بلا مـــــن
يبعـــــد ولكــــنه من الــــــــروح داني
حبيب قلبي ذيك الايام هــــن..هـــــن
عجــــــزت تغيرهن عـــــــوادي زماني
يازعفــــــران الـــروح .. ياهيل يابــــن
دارت فناجــــــــيلك وصحصح لساني
وين انت ابوعادل ذلول الرجــــا حــن
لفياض ودّك والحــــــنين احـــــتواني
ياقاهــــــر الميلات ياضاحــــك السن
يادافـــن ٍ جرحــــك برمـــل المحاني
تصبر وترضى بالقـدر..تحسن الظــن
ومــــن قابلك مايحسب إنك تعـــاني
لو الرياح بكل الاشجـــــــار هاجـــــن
وقفــــت عالي راس..ثابت جــــــناني
واسلم لاخوك..وليتك تقول شل عن
بعض الهموم وترقــــــــد الليل هاني
الأحمد
للشاعر المبدع.فهد بن عقيل الطويان
باسم الكـــريم الخالق النافـــــع الضار
الواحــــــد اللي كــــوّن الكـون بيديه
ياقاف حــــي اللــــــي بالاشعار بيطار
استاذه الفاهـــــــم مطــــــوّع قوافيه
احمــــــد بن ناصـــر بالاشعار مــدرار
دكتــــــــــور باوزانه وروعــــــة معانيه
خالي عــــــزاي ومكرم الضيف والجار
والخالــــــدي ماهـــوب ينسى بنيخيه
بحــــر ٍ تلاطـــــم فيه حلوات الاشعار
استاذ جــــــيل اليوم كــلّ ٍ سمع فيه
جــــزل المعاني فـي قـــــوافيه حضّار
لابايع ٍ شعــــــره .. ولاهــــوب مهديه
استاذنا به نفتخــــــر نسل الاخــــــيار
والله مالــــوم اللي الى جــــــاه يغليه
ياقاف انا عاذرك لاصـــــــرت محـــــتار
وإن قلت الأحمد صعب مااحد ٍ يجاريه
عمـــــــق البحــــــر ماياصله كود بحار
واللي نظـــــــر للشمس بالعين تعميه
وصاف الذهـــــب مايمــــلكه غير تجّار
وإلا ضعيف الحــــال ماهـــــوب شاريه
يامسندي .. ياعــــــــزوتي واف الاشبار
يالوافــــــــي اللــــــــــي مايغيّر مباديه
جـــــتك البيوت اللـي كسيفات وقصار
ياللي طـــــريقك صعب تتعب مماشيه
يفــــــــــداك نمـــــام ٍ به الشــــر ثرثار
زود الغـــــــرور وشوفة النفس تطغيه
ياعــــــل ماله يافتى الجــــــــــــود ديّار
بــــــــــديارنا مايــــــــوم نسمع بطاريه
مـــــــع البخــــيل إمغل يمناه وإيسار
عـــــــريان وفلــــوسه تثقّل مــــخابيه
ابفتخــر فـــي مدحـــــــكم بين شعّار
واللي جـــهل لاهنت مانيب مـــوحيه
واقبل سلامـــي يالسنافي والاعــــذار
طيــــب ٍ وصلني منك مانيب مــــوفيه
وصلـــوا على المخــــتار بالسر وجهار
إعداد ماحي ٍ سمـــع صــــــوت داعيه
هامة نجد
للشاعر العذب . سالم الجهني ، ينبع
احمد الناصر من الشعار .. شاعر له مكانه
قلتها من خاطــري .. والناس ديم يعرفونه
الشهادة عند بعض الناس وسط القلب امانه
والصحيح اللي نقوله للعــــرب لايجحدونه
راعـــــي الامثال قاد الشعر .. ويطور كيانه
يروي الاشعار من فكره .. وفكره تفهمونه
الشعر دايم يحكمه .. والمعاني من لسانه
نعــرفه رجّال حكمة كل ماهاضت شجونه
ينظم الشعر الجميل اللي عن المنقود صانه
يكسب الجمهور .. والجمهور دايم يسمعونه
القصايد صيـــد واحمد صادها باول زمانه
صوب البندق عليها والهدف مايحيل دونه
فخر نجد وهامته .. رجّال يعرف بالذهانه
صقر من نسل الصقور اللي على العالي حصونه
احمد الناصر من الشعار .. شاعر له مكانه
قلتها من خاطــري .. والناس ديم يعرفونه
القلب يسعد بك
للشاعر الكبير. سليمان العليان. عنيزة
يا احمد الناصــــــر دعاني لك الشوق
وارسلت لك معناي كـــــوده يشوقك
أنت الذي في سـوق الاشعار لك ذوق
والذوق كله يافـتى الجــــــــود ذوقك
وانت الذي تلعب على كـــــل طاروق
والقلب يسعد بك ويعشق طـــروقك
كــلٍّ على الثاني له اسباب وحقـــوق
والوصل مطلـــــوبي وبادي حقــوقك
يشهد لك القصر والأسوار
للشاعر الأنيق . يوسف الضالع
وشلــون بشكـــرك يالشاعر
واكتبك قصة مــع الامــــطار
مــــرور حـــرفك ماهــو عابر
يشهد لك القصر والأســـوار
يالكــــــون بالله لاتــــــــكابر
قلها صريحـــــة بليا اشـــوار
قد شفت مثل احمد الناصر
وبندق قصايـــــــده يومه ثار
وشلــون قلب الشعر صابر؟
لاصار حــــرفك يبوح اسـرار
احمد قصيــــدك يجي هادر
ماشفت مثله .. ولاقــد صار
الشاعر الوجدي
الجميل ابو اسامة المنيعي قابلته في احدى المناسبات فكانت هذه الأبيات
صافحت في حفلكم الشاعر الوجدي
احمد ابن ناصـــــر المشهـــور بابياته
الشاعــــر المبدع بموروثنا النجــدي
المرهـــف اللي فــــــريد ٍ في عباراته
ويااحمد ارسل حروف الشعر ياجدي
وقله ترى ابدعت فـي شعرك وغاياته
وقله عسى عمــــــركم بالخير يمتدي
وطيبه بشعره ترى مــــن طيب نياته
هرم شعر واخلاق
ويعود المبدع فهد الطويان في تفاعل بينه وبين الشاعر عبدالمحسن المحيسن
تسلم عسى سهــــوم المنايا تعداك
يالمحيسن اللـي ماتمـــد الزهـــايد
لنا الشرف في مدح مثلك وشرواك
واكبر فخر من شيخ جــزل القصايد
كم واحد قال احمد بمـــدحه اغناك
مـــــــن غير ابوعادل للاشعار قايـــد
هرم شعر واخلاق ماهــــوب يخفاك
وشيخ ٍ ورث طيب الجـــدود وعوايد
وعن فخـــرنا به من نشد لا عدمناك
قله فهد عقيل .. والجــــــــد زايــــد
.
.
إضاءة
يتميز الشاعر الكبير صالح عبدالعزيز اليحيى بإحساسه العالي وقربه الشديد من مشاعر من يعرف ومشاركة الجميع افراحهم واتراحهم .. ابو خالد اثناء مرض زوجتي الغالية ام عادل رحمها الله كان يقاسمني الحزن والقلق وبحكم قربه مني وعمله بمستشفى الملك فهد التخصصي ببريدة كان متابعا لحالتها ويعرف ادق التفاصيل عن وضعها الصحي .. هو لم يكتف بذلك بل استنطق صمتي وحزني وكتب قصيدتين هما اصدق ماقيل عن وضع ام عادل وعلاقتي بها وحزني عليها .. سأقدم لكم القصيدتين مع خالص شكري وامتناني لصديقي الوفي صالح .. والشكر موصول لكم احبتي.
.
احمد وام عادل
التضحية والصبر مع صــدق الايمان
صفات مـؤمـــن يحتسب ما يجـادل
والمـرجلة في شاعـــــــرٍ كله انسان
سما بشعـره عن عنــــــــودٍ و جادل
يكتب بياض ويمتلك ســـــــرّ الالوان
يكتب قصيــد بمفـــــــردات العنادل
احمد اذا هي بالأخـــــوّة و الاخــوان
يشـــــــرب محــبّة روح والقلب نادل
عمـلة فريـــــــدة نادرة ما لها اثمـــان
ما يخضـــع لمفهــــوم سعـــر التبادل
شفت الوفــــا وقفة مهــو بس عنوان
بين احمــــد الناصــــر وبين امّ عادل
.
دمعة رجل سالت وفاء
ضاق الصدر وارض المعاني كئيبة
والحــــــزن ثوّر في خفوقي غباره
حسيّت ما بيني ... و بيني بهــــيبة
والحــــرف غارق بالحزن والمرارة
وابعدت لكــــــــن الهموم القريبة
عيت تفارق خطـــــوتي في مساره
دمعة رجل سالت وفاء .. ما تعيبه
لا والله الا تستزيـــــــــد بوقـــــاره
ابختصــــــر واللـي تجيبه .. تجيبه
ذا صــوت روحي وابتدي هالعبارة
مخطـــــوف لونك يا وداع الحبيبة
باهت وضاعت حمــرته في صفاره
يا سلوة القلب الجــــريح و طبيبه
رحتــــــي و كمّل رحلته لانكساره
ما عقب فقـــــدك يا غناته مصيبة
ولا فيه غيرك مــــن يعدّه خسارة
كنتي أمل رغــم الظروف العصيبة
كنتي صبر كنتي شمــــــوخ ومنارة
كنتي حكاية حــــــب فعــــلاً غريبة
حـــتى ذبولك للحــــــــياة إستثارة
كنتي بساطـــــة يا ام عادل و طيبة
كنتي مجــــرّة والنجــــــوم بمداره
أحمد حبيبك لكــــن الكذب خيبة
فقــــــدك كسر قلبه وهو باعتباره
صابر .. ولا شق من الاحـزان جيبه
كبير فــي حــــــــزنه على نور داره
كنتي .. ولا زلـــتي بعــــينه حـــبيبة
نامــــــــي بقلبه والهميه انتصـــاره
طبتي حضــــور .. و طبتي بكل غيبة
طبتي وفاء .. طبتي ســـلام و طهارة
.
.
حكايتي مع الرس
نشرت قبل فترة مقطوعة شعرية عن الرس في تطبيق اكس .. وقد تفاعل كوكبة من شعراء الرس الرائعين مع الأبيات .. يسعدني ان اقدم لكم ابياتي اولا:
.
الرس
الـــرس ديــــــرة عارفين المواجيب
اللي لهم في ساحــــــة العـــــز رآيه
اهل الوفاء والخير والجود والطيب
بيض الوجيـــــــه وكارهين الوشايه
من طيبهم تغـــــرق بزين التراحيب
ومن صدقهم كنك تشاهــــــد مرآيه
قل للعليل يــــروح للـــرس ويطيب
هــــــــذي حقيقة لا تحسبه دعـــاية
.
الآن اقدم لكم تفاعل شعراء الرس مع الأبيات وهم مع حفظ الألقاب.
الرس تفخر بك
الشاعر صالح العوض
الرس تفخــــــر بك بكل الاساليب
وانت الذي في عالــــــم الشعر آية
قدرك يا ابو عادل يفوق التراحيب
كل القلــــــــوب بحبها لك وصاية
.
الرس تنسج من حروفك حكاية
الشاعر سليمان الرميح
اهلا بمن هو يبدع القاف ويجيب
زين الحـــــروف بكل صنف ٍ وغاية
ابـــــدع بيوت ٍ خاليات من العيب
من كل فـــن ولون بـ اجمل عناية
هــــــــلا يابوعادل محبة وترحيب
الرس تنسج مـــن حروفك حكاية
عنوانها مشكــــــــور يامنبع الطيب
من اهل الحزم في مطلعه والنهاية
.
حييت ياشوق البنات
الشاعر ماجد العوفي
حيـيـت ياشــــوق البنـات الـرعابيب
اللــي لهـن فـي عـالـــــم الــزين آيـه
يفداك من شعره بشذب العراقيب
وغمـط الحقـايق والـوشـاية هـــواية
انصفت(صبيان الحزم)حق ومصيب
كلمـة وفـاء مـالك بها أيات غــــايـة
وليتـك تسـير ياحصــان الاطــاليب
يجـي معـك ربعــك وأجيب أخويايه
نبـي نتـعرف والمعـارف مكـاسيب
ونـبي نتســامـر بالشعـر والحكايــة
جلسة ربع مابـه ضيوف ومعـازيب
هـذا هــوى نفســي وهــذا منـايـه
.
تبشر بعزك
الشاعر صوت الرس
يا مرحبا بك في معالي المراقيب
وأنت على ما قيل بالشعـــــــر آية
الــــــرس رسك بالليالي المناكيب
تبشر بعـــــزك مايبي لك وصــــاية
.
مشكور
الشاعر سلطان الحمود
اهلاهلا باللي يسوق التراحيب
بابيات شعــــــرٍ فاح منها شذاية
شاعــر كتب بالرس قافٍ بترتيب
من سبته عالــج جروح ابحشايه
مشكور ياللي معتل ٍ بالمراقيب
احمد ولد ناصـــر (يوافق هوايه)
.
اهلا هلا
الشاعر صالح الفوزان
أهلا هلا باللي نصا منبع الطيب
اللي لهم في معــــرفتكم هوايه
واديارنا كله لها حـــــق وانصيب
ديـــــــرة لها في منبع العز راية
أقولها وأكيد في قولي امصيب
كلن يوافقني وياقــــــــف معايه
وصلاة ربي عد شبان مع شيب
علي النبي رمز الهدى والهداية
.
.
قبل الختام
ثلاثي التكد
عقلك وشعرك متعباتك من سنين
عقلك غريب وجل شعرك حـــداثي
وجيتك انا صــــــرنا .. ثلاثة مجانين
الله يعينك من نكــــــــد هالثلاثي!!
.
ختاما
ارجو ان نكونوا قد وجدتم المتعة والفائدة في هذا الإصدار الجديد .. تقبلوا خالص تحياتي وتقديري🌹
تعليقات
إرسال تعليق