شتويات الأحمد .. إصدار جديد للشاعر احمد الناصر الأحمد
🔥( شتويات الأحمد )🔥 إصدار جديد يضم اغلب قصائد احمد الناصر الأحمد التي استوحاها من الشتاء وكتبها عنه
.
.
(ليل الشتاء)
بـــــــــرد يلف الامـــكنة والـــــــزوايا
برق ورعد واحساس بالصمت والليل
وملامـــــــــح ٍ تدفي بــــــرود النوايا
وقلوب ضخّت بالعـــــروق التفاصيل
واحـــــــلام صارت للنفــوس المــرآيا
واحـــــــزان نامت فــي ثياب التعاليل
ليل الشتاء بـرد وهـــــــروب وحكايا
خوف ورجا .. رنّة حجـــــول ومواويل
ليل الشتاء خـوف وحــــروب وسبايا
نار وشعــر ورجــــال .. صفّة معاميل
ليل الشتاء ميعــــــاد رد الهــــــــدايا
لاصار مايصبر على العطـــــــر منديل
لاجاء الشتاء فــــ،زّت جميع الخــفايا
ياوينــــكم ياجامعين المحــــــــاصيل
ليل الشتاء نصــــــــر ٍ لكــــل الصبايا
واكبر هـــــزيمة شاملة للرجــــاجيل!
(فصل الأمطار والخير)
اقبل علينا فصل الامــــــطار والخير
الله يبارك للجميـــــــع بقـــــــدومه
" فصل الشتاء " جعله ربيع ٍ وتيسير
وعسى الفيافي ترتـــــوي من غيومه
وجعل الخـــــزامى والنفل والنواوير
يخفي جفاف الارض زاهي رســــومه
(قيس الشتاء)
فصــل الشتاء يحيي جميل الهواجيس
لـ اقــبل علينا .. فــي وقــــــاره وبشته
ليله تعطـــــر من بخــــــور الاحاسيس
ومااحــلى نهــــــاره بين طلعة وكشته
من كثر حـبي للشتاء صـــرت له قيس
وان عذربه شخص ٍ مــن الناس هشته
(سهيل)
انا احـــب سهيل واشتاق لـ سهيل
سهيل مرســـول الفــرح والسعادة
ينقـــل بشارات الـبرادات والســيل
ومن يعشق الكشتات .. جهّز عتاده
سهيل صحى الجمــر لمنادم الهيل
وجــــه الشتاء بالليل مقبل بــراده
(قنديل الحنين)
فصل الشتاء يفتح كتاب الذكـــريات
ويقلّب الصفحات من ماض السنين
صبحه مياديــــن ٍ لـــ خــيل الأمنيات
وليل الشتاء زيت ٍ لــ قنديل الحـنين
فصل الشتاء اجمــل نهايـــة للشتات
ليله دواء العشاق والجــــرح الدفين
(برد المشاعر والاحساس)
حلــم الشتاء وش فيه ذابــل ويابس؟
كنّـه تربّــى فــي خيـــــالات هالنـاس
بــرد الشتاء تدفيه بعض المــــلابس
الموت في برد المشاعر والاحساس
(المكاشيت)
ياكثر شــــوقي للشتاء والمكاشيت
وياكثر حـــبي للمطــــــــر والبرادي
للبــــر لذة يجهله ساكــــــن البيت
وريـــح الحطب والبن تبهج فوادي
(راحة البال)
مااحلى الشتاء (سهره ..ضويّه وسمّار
وياطـــــــــــــــول ليله لاسهرته لحالك
تطــــــــرب سواليفه مــــع البن والنار
لاصـــــــرت متعافــــــي ومـرتاح بالك
(ليل ومطر)
ليل ومطــ،ر واصـوات تحتاج للصوت
واوراق مبتلة ومطلـــع قصيــــــــــدة
والساحل الممتد في موعــ،د الحوت
يزيـــــــد وحشه والمــواني بعيـــــدة
وام ٍ تدفّــــــي طفلها في ورق تـــوت
وشيخ ٍ يطالع فــي قصاصة جريـــدة
ومصباح تولد به فراشات وتمـــــوت
والوادي الممطــــــور ينزف وريــــده
وعيون يسرقها الكـرى حلمها القوت
وعيـون من قل الكــــــرى مستفيدة
وطيور وقّفها المطـــر عجـزت تفوت
والليل حــــــوّلها عــ،ن اللي تريــــده
واحـــلام شوّهها فضا صــدر مكبوت
وهواجس ٍ لوهــــي قريبة بعيــــــدة
فوضى ضجيج ٍ يعقبه صدمة سكوت
مثل الخيال ان شاف فكرة رشيـــدة
(قصة طويلة)
بين الشتاء والبـرد والشوق والليل
وريـــــح الحطب والبن قصة طويله
والبــرد والخـــــــلان والبر والسيل
وقصايـــــــد ٍ تـروي كبـــــود ٍ عليله
ورجال يحيون السهـــــــر بالتعاليل
كلّ ٍ يجيب مــــن السوالف حصيله
فصل الشتا معشوق كل الرجاجيل
يزهــــــر نهاره واجمل البــوح ليله
(ديم)
ريح المطر .. صوت المطر لاصار ديم
نفـــحة سعادة مـــن إلهي عاطــــــرة
والحمــــد لله امطــرت كل القصــيم
واغلب مناطــــــق مملكتنا ماطـــــرة
(جنون الشتاء)
كنتي مثل ليل الشتاء بـــوح وإلهام
كنتي رعـــــــد وامـــطار يشبه نهاره
كنتي شغوفه بالقصايـــــــد والالهام
مثل الشتاء كنتي جنووون .. وإثارة
وينك تركتيني لوحـــدي من اعوام؟
واللي بقى طيفك .. وعطـر وستارة
(جمعة ورعد وبرق)
جمعة ورعد وبرق .. خيرات وامطار
مــدّوا الى رب الخـــــلايق رجاكــــم
ادعوا .. الحّـــوا بالدعــاء سر واجهار
وصلوا على اللي للسعادة هـــداكم
يارب .. تبـعدنا جميعا عــــــــن النار
ولاتحرمون امـــــــواتكم من دعاكم
(صيام ومطر)
الغيم مع صــوت المطر لذة الصوم
فيها إنبساطك بهجتك وإنشـــراحك
من فضل ربي جــــوّنا امطار وغيوم
البرق نبض الليل .. والصبح ضاحك
(بريدة تلبس الابيض)
الثلـــج ينسج من بياضه قصيــدة
ويمزج بحبات البــرد عطر الاسعاد
وينثــــر بياضــــه بالحبيبة #بريدة
دار المكارم والوفاء وارض الامجاد
لاجاء المطـــر تلقى بريدة سعيدة
وعم الفــرح مابين شيبان واحفاد
(مطر الصيف)
حنا دخلنا الصيف والموسم الحـار
وشكل الشتاء من رحمة الله يبينا
واكبر دليل اللي نشوفه من أمطار
في اغلب الايـــــام تمطــــــر علينا
شكرا الهــي نحمدك ســـر وإجهار
تعــــطي وحنا للنعــــــم شاكــرينا
(امطر على غفله)
البارق اللـــــي ناض واشتــــد واخـتال
امطـــر على غفله وانا اقـــــول تـــــوّه
احيا اليباس وسالت شعاب ورمــــــال
مات العطش بالارض مـن فيض نــــوّه
صافي مثل حلــــــــم ٍ تشكّل بالاطفال
وافـــــي جمع بين السخا والمـــــروّة
يااجــــــمل احلامـي ويامـــــوعد ٍ طال
فــز الخفــــوق اللي ترجـــــــاك هـــوّه
اثـــــــر الصبر لاطال واشتـــــد وانجال
مثل الفـــرح لامن غشا القلب قـــــوّه
اللــي ربطــــني فيك ياطيّـــــب الفـــال
سمّه عـــــلاقة حــــب .. سمّه اخــــوّه
اللـــي جمــــع مابيننا صعــــــب ينقال
خــــــل نتمتع فـــــي صخبه وهــــدوّه
وان جاء من اهل الحسد والعذل رجّال
قــــل كــــل ماتقـــــــدر تسويه .. سوّه
هالحين طاب الليــل يامــــــــريّح البال
ومــن قبل اعــــــرفك كان ليلي مشوّه
(وادي الرمة)
حييت يا وادي الرمـــة طاب ملفاك
الخـــير شوفك والسعادة قـــدومك
اعيــــــوننا ترقبك مـن يـوم ممشاك
يامحـــــــلا ليلك وياطــيب يـــــومك
شــــــــرفتنا فـي منطقتنا..وحـــياك
في ماك في طينك..هديرك عقومك
هــــذا القصــــيم بكل شوق يتحراك
وياكــــبر فــرحتنا بلحظة قـــــدومك
(الجو بارد)
سمع أذان الفـجـــر فتّح عيونه
جلس دقايــــق ماتحـــرّك يفكّر
يشعــر بأن النوم يثقل جفــونه
والجـــو بارد والمــــزاج متعكّر
قال الصلاة الدين مايجوز دونه
وحاول عن افكار ٍ تــردّه يسكّر
جـــاه الـذي كل المــلا يلعنـونه
قال : إستريح شوي توّك مبكّر!
(المطر نعمة)
نحمد المولى على الخير العميم
خامس الأيام..والامطـــــار ديــــم
وصارت الاجـواء بفضل الله روعه
المطــــر نعمة مـــن الرب الكريم
وصارت بريدة مــن الفرحة تباهى
والفــــرح والخير في كل القصيم
ومملكتنا كلها بـ امـــــن وسعادة
خيرها يشمل مواطــــن والمقيم
(صباحكم دافي)
صباحكم دافي رغـم شدّة البرد
صبـح الأمــل ومكللٍ بالسعادة
نـور التفاؤل فيه محفوف بالورد
وكل واحــدٍ منكم يحقق مـراده
(الأناني)
محتاج لك بالحــــــيل بقبالة البرد
مــــن فيه غيرك في دفاه احتواني
كل الصحاري من بعد غيبتك جرد
ياشيـــح ياقيصوم .. ياقحــــــوياني
مجتمعة كــل البشر فيك يافــــرد
مايشبهك بالناس مخــــــلوق ثاني
الضحك والسهرات والعطر والورد
الكل " ينطر " عــودتك يا الاناني !!
(طناخة)
ياناس فصل الشتاء مطنـوخ
بـــــــــرده وليله ... وسمّاره
لارش عطـــره ولبس الجوخ
واقبل على الناس بـ امطاره
(احيّه)
"احيّييه" يابــــــــرد الجفا والمواعيـد
و "احيّييه" اكثـر .. يا غياب الحـبايب
كل القصــايد والقصص والزغـــــاريد
تحضر .. ولكن صاحب الشان غايب !
(جرح شمالي)
كل مالاح بـــــــرق ٍ فــــي عباة الشمال
تشتعل ذكـــــــــريات ٍ وافــــيه واختفي
واستلذ الهــــواجس بين صفـــر الدلال
جاهــــزات ٍ جميع وجمـــرهن ماطفي
ذكـــــريات ٍ توارد والحضــــــور الرجال
وكـل صـــدر ٍ تنهّض بالمحــبة دفــــي
وامطرت ذكــريات وداخل القلب سال
وادي ٍ من ورا حــــايــــل ورويت نفــي
ودارت احلى القصايد والبخــور الغزال
والمحـــــب ان تعطـــر بالغــــلا يكتفي
كل ماهاض عاشق بالحــــــديث الزلال
زان جـــــو القلوب المغـــرمات وصفي
ذكـــــــريات حسبها كل جاهـــل خيال
وش غنيمة خـــــــــلي البال غير النفي
كل مالاح بــــرق ٍ عــدت لـ اربــــع ليال
اشتعل واتجمّـــــــر لجــــــلها واحتفي
شفت قيها جـــمال ٍ غير كـــل الجمال
اصدق الحسن واضح واخطره مختفي
السعادة قصيرة في ربـــــــوع الشمال
وكل جـــــــرح ٍ شمالي للمشاعر وفي
(حكاية)
بين المطر والأرض اجمل حكاية
سطورها فاحت عطور وتفاصيل
فيها البـدايـة تمتـــــزج بالنهــاية
والناس .. تشعل ليلها بالتعاليل
(صبح الشتاء)
صبــح الشتاء ياجماعة غير
لاذاب ثلجـــه على نـــــــاره
وليل الشتاء خارج التفسير
مابــاح للنــــاس باســــراره
(انت وضميرك)
لاجاء الشتاء صوتك شموع التعاليل
فيها يـذوب الليل .. وانت وضميرك
بينك وبين البــــــــرد حفلة تفاصيل
كان المطر ..صـوت المطر يستثيرك
اذا تذكــــــــرتك تساميت بالحــــيل
واذا نسيتك ماتذكّــــــــــــرت غيرك
(بشت الهواجيس)
ليل الشتاء يشعل بخور الأحاسيس
وتفـــــــز لقدومه جـــروح ٍ قديمة
ليل الشتاء بشت ٍ لبـرد الهواجيس
للبوح فيضة عشق.. للحــــب غيمة
(راح الشتاء)
راح الشتاء فصل المطر والنواوير
يامحــلا جــــــــوّه .. ونفحة براده
والصيف مقبل ياعسى مقدمه خير
لوكان حـــــــــرّه كل عام .. بزياده
(حنين)
صوت الرعد مع لمعة البرق والسيل
تحيي بنفسي .. ذكــــــــــريات ٍ دفينه
يازيـــــــن جمعة هالثلاثي مــع الليل
قلبي معاهـــــا مايـــــــــــوقّف حنينه
قبل الختام
بعثت للصديق الشاعر المبدع . صالح عبدالعزيز اليحيى هذه الأبيات :
.
ياصالـــــــــح اليحيى تعبنا من الآهـ
ومن حزن يرسل من جيوشه قوافل
ياغالي والجـــــــرح ماهـــوب يخفاه
ياوافي .. بالخـــــير والحــــــب نافل
باقـول لك عـــــن شي عشنا وشفناه
احساس يجتاحن ولاهــــــوب جافل
ياطــــول وقت العصر بالصيف طولاه
لا صـرت متضايق .. وفاضي .. وقافل
فجاء الرد من ابي خالد :
.
لَـبّـيه .. يا عطـــــــــر الشعـر و المعاناة
يا ( فرض ) مــن بين السُـنَـن و النوافل
يا عِـــلّـة التلميــــــــذ .. يا داه .. و دواه
يا مـعَـلّـمه معنى العفـــــــــو و التغافــل
يا حاضـــــرٍ فــي طيب روحــــه و معناه
و هو .. عـ،ن التلميـذ (( ما كان غافل ))
القيـــــظ ( لعنة ) باول القيـــــظ و اتلاه
و استغفر الله ..لكـن القيظ (( سافل ))
انا معك( شتوي )و تسلم من ( الآآآهـ )
و اقـولها لك و انشــــــره بالمـــــــحافل
.
.
ختاما
هذا ماامكن جمعه من نفحات وترانيم العاشق المغرم قيس الشتاء . احمد الناصر الأحمد .. على الحب والخير نلتقي دائما🌹
تعليقات
إرسال تعليق