(( الأسوار)) ديوان ذاتي وجداني .. احمد الناصر الأحمد.
{{ الأسوار }}
قصائد ذاتية .. وجدانية
احمد الناصر الأحمد
.
.
إضاءة
يسعدني ان اقدم لكم بعضا من تجربتي الشعرية بشقيها الذاتي والوجداني دونما وسيط اومقدمات .
كلي امل ان يرتقي ماتقرؤونه هنا الى مستوى ذوائقكم.
احمد
١٤٣٥/١/١ هـ
.
.
(كتاب الله)
هذا كتاب ما يقارن بغيره
هذا كتاب الحق والصدق والنور
فيه السور نور البصر والبصيرة
محفوظ بامر الله عن الشك والزور
فيه الكبيرة واضحة والصغيرة
منهاج صدق وعدل مرشد ودستور
نزل على الهادي وقاد المسيرة
من بعثة محمد الى نفخة الصور
(حب الرسول)
دين الله الباقي ومن خالفه ضل
خالف قوانين البقا .. والطبيعة
كل ما يزيد الكفر والظلم والغل
نزيد في حب الرسول .. ونطيعه
(القصيم)
خل النظر يأخذ مداه.. يرحل على أي اتجاه
العين يغريها الجمال والقلب يسعد بالنسيم
الحسن في كل اتجاه.. واضح يشد الانتباه
يا ملتقى للعاشقين .. الله أكبر يا القصيم
تعانقت فيك المروج وأعذب مصادر للمياه
صاغت معالم للبهاء تشهد على الحسن القديم
حبك سكن كل القلوب واسمك تردد بالشفاه
يشرق ربيعك بالنفوس يزهر هنا .. وحب ونعيم
حسنك تشكل بالعيون عطرك تميز في شذاه
يا ورد نجد وروضها الطير في أرضك مقيم
يا اللي أخذت من الحياة أجمع معاني للحياة
يا ملتقى للعاشقين الله أكبر يا القصيم
(سدرة القلب)
الجمر صمتي .. واللهب بعض بوحي
والشاعر المسكون بالوعي مصباح
يا سدرة في داخل القلب فوحي
هدي جدار الصمت يكفيك ما راح
لو طال دربي ما يقصر طموحي
الله خلق في هقوتي عدة أرواح
احمل سلاحي ما بعد بعت روحي
في هالزمن ما فيه عاقل بلا سلاح
أكبر عذاريبي براءة وضوحي
واصعب عيوبي أني إنسان لماح
لا جيت افتش في ثنايا جروحي
كني أحس بشي مثل الأمل طاح
الله يا زيف الزمان الشحوحي
اللي مزج لون الحقايق بالأشباح
باقولها في صدق والناس توحي
معقول به شاعر بهالوقت مرتاح؟!
(قطعة السكر)
يا قطعة السكر وذرات الاحساس
في نكهتك حسيت باهلي وناسي
أخفيت كاسي عنك نادى لك الكاس
حتى قدرت تصبني وسط كاسي
طعمك جرى بالدم يا عطر الانفاس
الغيت خوفي .. حيطتي واحتراسي
وشكلت من عمري حبايب وجلاس
حتى غديت الهامشي والأساسي
يا قطعة السكر .. ويا قطعة الماس
شفني أمل واحلام .. شفني مآسي
يا قطعة السكر أنا مثل هالناس
أحيان ألين .. وبعض الأحيان قاسي
من جيت للدنيا وأنا رافع الراس
حتى عرفتك وارتفع زود راسي
كل ما تذوب شوي ألمح شبح ياس
معك انتهى خوفي ولا مات ياسي
تذوب أكثر يشتعل برق واعراس
تذوب واذكر بعض ما كنت ناسي
تذوب .. تصغر ألمح جيوش واجراس
تذوب .. تهتز الجبال الرواسي
تذوب يذبل حلم .. وتزيد حراس
كل ما تذوب شوي يضعف حماسي
يا قطعة السكر .. ترى الموت الافلاس
ذبتي وأنا اللي صرت بعدك أقاسي
ليل الأسى والحزن ما يعرف قياس
بعدك نخيت الصبر واسرجت باسي
يا قطعة السكر وذرات الاحساس
من يوم ذبتي جف قلبي وكاسي
(دعوة مستجابة)
ازرع كفوفك بالدعاء ينبت الصبح
خل الرعد والبرق نبض السحابة
الخير .. كل الخير والنور والربح
لا جت من الله دعوة مستجابة
(الأسوار)
مثل احتضار الأسئلة .. مثل الإصرار
مثل القلق قبل افتراش السكينة
مثل انبعاث الرعب من جذوة النار
مثل الأمل لا مات فوق السفينة
مثل التردد بالخطى عند الأسفار
والنزف داخل ذكريات دفينة
مثل الصراخ الميت في بعض الأشجار
مثل الفرح لا من تعثر بحينه
مثل الأمل لا مات في روس الاخيار
مثل التناقض في ليالي المدينة
مثل افتعال الهرج عن شي ما صار
والضحكة الحلوه بشفه حزينة
مثل اقتحام الصعب مثل الهوا الحار
مثل ابتعاد الطفل عن والدينه
مثل الشرود المر في بعض الافكار
مثل التنكر للأيادي الأمينة
مثل ارتحال العمر عن بعض الاطوار
مثل الترفع عن دروب الضغينة
مثل الألم لا ضاع بيدين الاسرار
مثل الذكاء لا من تجاوز سنينه
هذا أنا والا انت لك حق تختار
درب الشقا ما بيننا قاسمينه
نهرب من الاسوار ونحب الاسوار
النفس حساسة والاوضاع طينة
(العطش)
البارق اللي ناض واشتد واختال
أمطر على غفلة وأنا أقول .. توه
أحيا اليباس .. وسالت اشعاب وارمال
مات العطش بالأرض من فيض نوه
صافي مثل حلم تشكل بالأطفال
يا أجمل احلامي ويا موعد طال
وافي جمع بين السخا والمروة
فز الخفوق اللي ترجاك .. هوه
مثل الفرح لا من غشى القلب قوة
أثر الصبر لا طال واشتد وانجال
اللي ربطني فيك يا طيب الفال
سمّه علاقة حب .. سمّه أخوه
اللي جمع ما بيننا صعب ينقال
خل نتمتع في صخبه وهدوه
وان جا من أهل الحسد والعذل رجّال
قل : كل ما تقدر تسويه سوه
هالحين طاب الليل يا مريح البال
ومن قبل اعرفك كان ليلي مشوه
(عدالة)
لو المرض والموت يفهق بالأثمان
كان الضعوف اعمارهم بالدقايق
لكن حكمة خالق الإنس والجان
إن العدالة شاملة للخلايق
(القصيدة)
إحساس بالغربة ورعشة بالأطراف
أشياء تغيب .. وتولد أشيا جديدة
وجميع ما حولك أخذ شكل الاطياف
وللذاكرة ترجع مواقف بعيدة
وتفتح لك أبواب وتعرض لك أوصاف
وتسرج لك جياد الخيال العنيدة
وتطلع لك أفكار تخوّفك .. وتخاف
وتحيط فيك أفكار دنيا بعيدة
وتصير وانت إنسان مرهف وشفّاف
الكون كله يجتمع داخل إيده
حالة غريبة ما توصف وتنشاف
من عاش فيها .. شاف فرصة فريدة
قدومها فجأة .. تفاصيلها إسراف
وألوانها .. وآثارها بالقصيدة
(من تكون) ؟!
قالت : من تكون بالتحديد
يا الشاعر النازف المجهد
يا المتسع والمراجل بيد
يا المبتعد حيل يا الابعد
يا المرتفع عن ظنون الغيد
يا المنطوي لا متى تزهد ؟!
من انت قلي وخل الكيد
اصدق مع اللي بك استفرد
قلت اصدقك والحقايق صيد
خذها من الاقرب الأوكد
الله خلقني وكره القيد
آقف حسب رغبتي واقعد
وانما بقيت بحياتي سيد
أموت من قبل ما استعبد
وبحكمة الرب صرت وحيد
إلا مع الصدق والمسجد
كان رمضاني بليا عيد
فالصوم للصادقين افود
الحب والعشق والتغريد
كرهتها داخل المشهد
ومليت من كثرة الترديد
وخذلان الابيض من الاسود
لوشفتني رايح لبعيد
مبعد ولا نيب مستبعد
أشياء كثيرة تهد الحيد
في داخل النازف المسهد
ذا بعضها وان بغيت ازيد
الله يعينك على الأزود
قالت : كفاية وصل ما اريد
اللي ذكرته هو المقصد
انا عرفتك وبالتأكيد
أنت .. أحمد الناصر الأحمد
(نجوى)
لا سكرت قدام عينك دروبك
لا من غدت شكواك أكبر من الآه
لا من توجه جيش الاحزان صوبك
لا صار همك وين ما رحت تلقاه
نفسك وخلانك .. أهلك وجيوبك
ما تنفعك .. ينفعك ما يرضي الله
(بعض الصدف)
الله على بعض الصدف رقة وأحاسيس وشجون
يمكن تشوفه عابرة والخير في مكنونها
كم صدفة من صدقها تروح للقلب وتمون
لما تغلغل بالمشاعر ما تجوز بدونها
الله عليها صدفة تجاوزت كل الظنون
حتى بدت أيام عمري تكتسي من لونها
هي عارفتني من أكون وأنا عرفته من تكون
سيّرت اسطول المشاعر في مجاهل كونها
واطلقت له كل الحمايم من بعد طول السكون
من يوم شافت شمسها قامت تجر لحونها
الله على اللي وصلتني بالغلا حد الجنون
الموت والله عقلها .. لا والله إلا جنونها
الله على اللي لو يخون الغير ما تقدر تخون
غير المحبة والوفاء ما مر في قانونها
كل الخصال الرائعة جتها وضمتها بهون
السحر جا في شكلها والصدق في مضمونها
الموت الأحمر مجتمع كله بهذيك العيون
يا كثر من بالمقبرة راحوا ضحايا عيونها
يا صعبها لولا الغلا والحب وإحساس حنون
وإلا النسا يا كثرها يا بسطها يا هونها
(صاحبي) .. !
صاحبي ليلك علامه سرمدي
نايم ٍ .. حلمك ورا صبح بعيد
لو تعلّق نظرتك فوق الجدي
دامت أنك ما وصلته ما يفيد
تكثر جروحك وأنا تعبت يدي
والصخر عيّا يلين من الحديد
انتهي من وين .. ومنين ابتدي
لو يموت الهم يبعث من جديد
ذنبك .. أنك بالمبادي تقتدي
والمبادي لا عشقها الحرقيد
وغلطتك في كل نجم تهتدي
الذكاء ما يفيد والواقع بليد
حاضرك ما هو بعيد عن غدي
والمؤكد .. ولد عم ٍ للأكيد
صاحبي ما بيك تشكي يا بعدي
صاحبك ما يمتلك غير القصيد
(جروحك)
لا تسولف للخلايق عن جروحك
دام عندك خالق الكون اشتكي له
وكل جرح مندفن في وسط روحك
يعلمه ربك .. وفي لطفه يزيله
(دامك مسافر)
دامك مسافر .. لا يطول غيابك
لولا ظروف ٍ تعرفه كان أخاويك
يبدا الفرح لا قلت لي : مرحبا بك
ويزيد لاجت بعدها : يا هلا فيك
من زود حسنك والبها .. والحلا بك
احس لا جيت امدحك كنّي أهجيك
كان الشعر يكره قيود المشابك
فاللي جرح حلم الليالي شبابيك
يا سيد الأحباب بي مثل ما بك
أنا أحبك حيل .. واهواك واغليك
ذا حب.. لا ..ذا عشق ..لا ..ذا تشابك
أبحرت ادور عنك في وسط عينيك
كل القصايد نوخت عند بابك
الشعر شعري .. والمعاني معانيك
(ليالي نازفة)
ليالي نازفة تبكي على أيام بدون شموس
وتنعي صيغة استفهام توارت خلف سبورة
دموع النجم تدفعها على مستنقعات البوس
صحارى تنبت الهامش جميع اشجارها عورة
ليالي تطعن الأشياء وتهتك حرمة المحسوس
تحوّل من حصار الوقت من جملة إلى صورة
قمرها مات في غزوة وقمراها جرحها موس
لها ثارات ترضعها رحيق احلام مقبورة
ما بين الظلم والظلما رهينة وضعها المدروس
رسوم اقدامها تصرخ على حيطان مجدورة
تسل بلحظة الرهبة من احدى اظفارها دبوس
ويرجع خوفها خايف من الدبوس وظفورة
ليالي نازفة تضحك وتبكي من صداها روس
مخاض الليلة الصعبة رسول الفجر مع نوره
(شهب العراقيب)
اذا بغاك .. امطر عليك التراحيب
ويسرف بمدحك لا بغى منك حاجة
واذا انتهى وراك شهب العراقيب
عقب المطر تبدا مواسم عجاجه
(لهفة الشوق)
دونك عروقي وازرعي لهفة الشوق
شبّي حرايق لهفتك في عروقي
وشلون جيتيني وانا ساكن فوق
وشلون فصلتي مزاجك لذوقي؟
لي قلب عاشق ما سكن فيه مخلوق
من قبل اعرفك كنت اشك بخفوقي
والمارد اللي داخلي كان مخنوق
فجأة .. تنهّض وانطلق كل عوقي
والفرحة اللي عانقت ساحل الموق
أحيت مشاريع الغلا وسط سوقي
انتي ومن غيرك من البيض به ذوق
قدرت تسوق الغيم لفياض نوقي
انتي عملتي شي ما هوب مسبوق
انتي أخذتي من حقوقي .. حقوقي
انتي ملكتي الحب.. والصدق.. والذوق
هذي بذورك والفيا في عروقي
(الضجيج والضوء)
دروب مزروعة وهم .. ضياع ياكل الدروب
لا من تجاوزت الضجيج والضوء ما تلقى أحد
سراب كل الأمنيات هروب يغري في هروب
غايات يحييها وعد واللي يكفنها وعد
حنّا تعودنا الضياء نجنيه من شط الغروب
حنّا خلقنا التضحية والصدق لعيون الحسد
توارت احلام كبار يبست على الواقع قلوب
يعيث بالنفس الفراغ يستوطن العين الرمد
حنا يمزقنا صراع دامي من اسباب الذنوب
حنا يفرقنا عبث .. واللي يجمعنا عهد
(سنابل ومسامير)
الليل عاصف والضحية عصافير
والدرب موحش والدليل الذيابة
لا شفت في وسط السنابل مسامير
فاعرف بأن الشر كشر بنابه
(طيبة البارود)
(الجمرة)
بك تزهر الشمعة .. ويخضر المداد
ولك من ليالي شاعرِك صبح ٍ ندي
ولي من بداياتك عصافير الفؤاد
ولك من نهاياتي بداية موعدي
لك من مشاويري مواعيد الحصاد
وصهيل حرف وريح .. وخيول تعدي
ولي همّة تكبر .. ولك عزم الجياد
كل ما أنتهى مشوار عندك يبتدي
ولي بالثرى حب ٍ وعشق وامتداد
ولك بالفضاء وهج ٍ خجل منه الجدي
ولي من رذاذ الهمس وأصوات التضاد
قوافل تسري .. ولك ركب يحدي
لك من بقايا الأمس طول الاجلاد
ولي رحلة من طولها خفت اغدي
لقيتك الجمرة تحت جفن الرماد
واشعلتها .. واثر اشتعاله هو غدي
ياما اجمل اللحظة .. ويا طيب الجماد
أثر الحجر حساس .. والرمل اجودي!
خلاص .. ما للحزن داعي والعناد
معك ابتديت وطاب هالحظ الردي
(طيبة البارود)
لا هند .. لا غادة .. ولا ريم ونجود
بنات حوا .. ما تسبب ذهولي
صحيح أنا عاشق وعاشق بلا حدود
لكن عشقي ما وقف عند ذولي
أنا أروم الصعب واصارع الكود
ابعد هدف ما يبتعد عن رسولي
بي طيبة ٍ لكنها فوق بارود
وبي حدّةٍ لو كان طبعي خجولي
أحيان أسافر .. وابتعد .. وابتعد زود
من شان أعود والحقيقة ذلولي
وأحيان أغامر واقتحم ذروة الطود
ما ارجع لما أشبع باقتحامي فضولي
ما نيب احسب لشمس وبروق رعود
ما هيب تقبل هالموانع فصولي
أغلب مساحاتي بها أشواك وورود
ماني مثالي حيل .. لكن اصولي
انظر بعيد ولا تقدمت ما اعود
لكن اقدر كل من عاش حولي
(وين أنت)؟!
أسألك وين انت .. يا بحر القوافي
تغري الأضوا .. وأنا أشوفك بعيد
شاعر الابداع وهجه غير خافي
ما يموت الصدق في حضن القصيد
في قصيدك تكتسي كل الفيافي
والفضا والبحر في ثوب جديد
شعرنا بالوجد يسخر منه (وافي)
والحكم والنصح يكرهها (لبيد)
وشعرنا بالوصف شعر غير كافي
من خطى (القاضي) عجزنا نستفيد
شعرنا الشعبي غديره غير صافي
القوافي صخر واوزانه حديد !
شعرنا مجروح جرحه غير خافي
زادت جروحه ولا طب يفيد
(بندق الحق)
لا تنخدع .. لا صرت وسط الثعالب
ومن قبل ما تسأل عن الشي لا تجيب
وان صار لك حق مع الناس .. طالب
ارم الهدف من بندق الحق وتصيب
(بحر كبير)
مثل الزهر إذا نفح أرخص هداياه العطر
ومثل القمر إذا صفى تزهر قلوب العاشقين
ومثل السحابة لا وقت للأرض فدموعه مطر
والأرض لامنه زكت ما تنبت إلا ياسمين
هذا انت لا منك عطيت تجاوز حدود البطر
من كثر حبك للبذل ارخص هداياك الثمين
وحبيبك اللي تشتهي في كثر حبك ما نطر
يا مالك القلب الكبير محبتك مثل اليقين
يا جامع ٍ كل الهوى والعشق في أجمل سطر
ويا مختصر كل المحبة والغلا في كلمتين
معقول يرسم روعتك من هو بداخلك انشطر
أقولها لك في ثقة سعيد أنا فيك وحزين
أدخلتني بحر كبير من دون ما حس بخطر
غرقت أنا في داخلك .. غرقت بس الله يعين
(أعراس ابتهاج)
يبحر الواقع على مركب خيال
وتسكن الفكرة على شاطي المحال
ويكتسي المعنى بألوان الحروف
وتشرب الكلمة من النبع الزلال
ويطلق الشادي ترانيم الحياة
وترقص الأغصان من ريح الشمال
وتشرق البسمة على الوجه الكئيب
والتسامح يكتمل بين الرجال
وتمنع الشمس الحرارة في حنان
لجل تخضّر الروابي والتلال
تأخذ الأعصاب راحة بالربيع
وتولد الأزهار من بطن الرمال
وتصبح الأيام اعراس ابتهاج
وتقرب الأشياء من حدود الكمال
تعجز الأشعار من ماضي السنين
دون وصف الحب .. أو وصف الجمال
(عادي)
عادي جميع الناس تحكي عن الحب
وعادي تسولف بالقيم والمبادي
بس اغلب العالم تعود على اللعب
هرجه بوادي .. والحقيقة بوادي
(صريحة .. صادقة)
خذها صريحة صادقة من دون تزييف ورتوش
مثل اليتيمة لا اختلت مع نفسها بفراشها
حاول تجاوز عطرها والكحل باطراف الرموش
ومن قبل تلمس جرحها حاول تحس بشاشها
لا تنخدع في طيبة تستوطن الوجه البشوش
ولا تنجرف مع شاعر اسمى العواطف حاشها
من قبل تعشق شاعرك فكرت وش تقدر تحوش ؟!
إلا بيوت نازفات والحزن يعمر جاشها
ما بيك في حلمي تعيش.. للشاعر أحلام تدوش
ما أبي أجرك للضياع ولغابتي واحراشها
ما بيك أنا تمشي معي والدرب مليان جيوش
خل العطور الهامسة تبقى بوسط اغراشها
لا تقول يا أروع بشر ازعل وعاندني وهوش
ودي أحس بغلطتي وأعيشها واعتاشها
مرفوض أبو كل البياض إن ما تصدى للوحوش
والله يجازي طيبة عمر الردى ما ناشها
يا فاتني ما فيه بنت ما تبهره كثر النقوش
وما فيه غادة مترفة تصبر على من هاشها
خلاص يكفي تضحية للصدق والوجه البشوش
اللي سمع بالمشكلة ما هو مثل من عاشها
(جارنا سالم)
من جارنا سالم عشقنا الحكايات
ونفرح متى بالحي تذكر وليمة !
نشعل بنور الوقت ليل المسافات
ونبحر مع المعنى على أمواج قيمة
في صدر سالم تجتمع كل الأوقات
لو أن سالم يذكر أنه قديمة
آخر حكاية قالها عند ما مات
وعلى أهلنا سولفن به حريمه
عن قصة معروفة وقتها فات
الأرض غرقت والمطر صار ديمة
كان الفرج للناس بالشمس بالذات
والشمس دونه غيم ما هيب غيمة
(إنسان هادي)
ضعيف حجة كل من يرفع الصوت
اقوى الحجج تستوطن انسان هادي
(مفاتيح)
دون القلوب اقفال تبغى مفاتيح
من يملك الحب الحقيقي فتحها
(مشاتل ورد)
عجزت أحدد شعور شدني يمه
إحساس جارف غمرني واجهل أسبابه
إحساسي الحب خاله والغلا عمه
والصدق والتضحية من أقرب اقرابه
شعور أحسّه وعايش فيه وأضمه
سعيد أنا فيه لكن كثر ما أشقا به
يشيل همي بطيبة نفس مع همه
لكن من حيرتي والشك مرتابة
ويسكن بدمي كثر ما استوطن بدمه
وفي كل شي يجي بالبال نتشابه
ما دام قلبه من اجلي ساكن فمه
حاولت أنا أزرع مشاتل ورد بالغابة
يا منية الروح هاللي داخلي سمه
واحكم وأنا الحكم لا جاء منك بارضى به
ومن بعد ما تزيح عن محبوبك الغمة
عز الله إني كذوب إن قلت كذابة
(الخطوة الأولى)
لقينا الخطوة الأولى قصيدة حب مع عصفور
وثنينا الخُطى شفنا ثلاث خيول مشنوقة
صهيل مهار مجنونة تخفى تحت سرب طيور
تسابق ظل يتبعها وهي بالظل مسبوقة
عجاج وبحر وبيوت يحوّلها الظلام قبور
وشيخ طاعن بالسن يضيع الهرج بشدوقه
وبنت رقصها آية والحسن فاق حسن الحور
تعيش بقصر للساحر ملكها وسط صندوقه
قوافل هاجرت عنوة وخلّت حلمها المكسور
طريق الهجرة المرّة على المطعون يا ضوقه
تدور الشمس والدنيا تدور وكل شي يدور
وتبقى الأرض للإنسان تحته والسماء فوقه
رجعنا لأول إخطانا فقدنا الشعر والعصفور
بحثنا عن بقية خيل وأثر الخيل مسروقة
(الفقر من جوّا)
لا تكثر البحث والتنقيب
عن حالة فلان وش سوّا
الفقر بالمال ما هو عيب
العيب بالفقر من جوّا
(روعة الـ قبل أمس)
يا روعة الـ (قبل أمس ) قبل امس مولود
يوم التقى حظي .. بحظك خرجنا
بالصمت سولفنا عن ايامنا السود
ساعة نطالع بعضنا ما هرجنا
يا حلمي الضايع عذا باتك شهود
واحلامنا اللي قبل أعرفك نسجنا
كني عشقتك طيف .. وادمنتك وعود
حتى لقيتك واقعي .. وامتزجنا
مدري أنا .. ولا أنت ما حس بحدود
كل الحقايق ترجمتها مهجنا
كنا نعيش العمر في درب مسدود
متنا انتظار .. وقرب الله فرجنا
أعيش بأروع حب ما دمت موجود
يا أجمل .. جمال الكون من خير مجنى
(صفحة الأيام)
معاني الفكرة النشوى تعانق مع جميل القول
سؤال يسكن الأعماق سألني الصمت من هوله ؟
صدى ممزوج بالحيرة عجز لا يحمله مرسول
مثل معنى الألم عرضه .. ومثل الصبر في طوله
أغيب أبعد مع أفكاري وأشكل بالخيال اسطول
أحب أكشف لك الواقع بدون ألفاظ معسولة
ترى من يعشق الكذبة رحل عن عالم المعقول
ويبني كل تفسيره على قاموس مدلوله
أقلّب صفحة الأيام لقيت أن الهدف مشلول
نزيف الجرح يا الغالي تزيد الناس من حوله
وتاه بغبة الحسرة وهو سائل غدا مسئول
يصارع له ثلاث سنين عجز يكسب ولا جولة
(أودية الحلم)
للقلب هاجس .. للخيال استدارة
بين الخيال وهاجس القلب محتار
آمال تبرق والمطر في غزارة
والأرض عطشى كيف ما تنبت اشجار
والحلم يفتح أودية للإثارة
ويعزف تقاسيم الفرح بين الاحجار
واللي تربى في رحاب الطهارة
قادر على فهم المشاعر والأشعار
(عطر الزمان)
ماني معلق تهمة التأخير في جيد الزمان
ماني عدو للزمن .. ولا خصيم للسنين
اللي مضى قبل المحبة بيننا كان امتحان
خوف وتردد وانتظار .. حتى وصلنا لليقين
انتي وصلتي بالأوان .. أكيد ما فات الأوان
وأنا انتظرتك في ثقة .. إنك مثل باكر تجين
نفس المحبة والجنون اللي انتظرته والحنان
نفس الدفا نفس الغلا نفس الوفا نفس الحنين
نفس المشاعر بالمحبة .. والذكاء والاتزان
بالضبط انتي مثل ما أبغى مثل ما أنتي تشتهين
نفس الدفا نفس الزعل نفس العتب والعنفوان
سبحان من صوّر جمالك ما خلق بك شي شين
هالحين حنا بالأمان .. معقول حنا بالأمان؟
عندي شعور بالثقة .. ما فيه داعي تقسمين
دامك عروس للخيال والله فلا أكون الجبان
والله لأضحي لأجل عينك بالعزيز وبالثمين
من يوم صرتي المستحيل اللي تحقق لي وجان
والله لأصير لنبض قلبك ولأحاسيسك أمين
هالحين يا عطر الزمان.. وشلون ما أحب الزمان
بعد انكسارتي الكثيرة .. جاد بالنصر المبين
(صحاري التيه)
السؤال الصعب ما يلقى إجابة
في صحاري التيه والحيرة يهيم
لمعة المكرور ..؛ونيون التشابه
باهتة .. قدام تفكير اليتيم
(عاشق ثقافة)
جلست أنا وياه .. حسيت بإنسان
نبل وتواضع والتزام ولطافة
قلت: أسأله وأعرف جوابه على شان
الغي الحواجز والزمن والمسافة
قلت: انتناقش، قال: أنا كلي آذان
ركّز ترى بعض النقاشات تافه
قلت: الحقيقة قال لي: مربط حصان
بعض البشر يربط محله زرافة
قلت الصداقة قال لي: خفق وجدان
يقل نبضه لا شعر بالكلافة
قلت المحبة قال لي: دم شريان
حار البشر في نكهته واختلافه
قلت الوفا قال: استراحات فرسان
تستقبل اللي صادق باعترافه
قلت: التواضع قال لي: ظل بستان
يجمع نهايات الورم والنحافة
قلت الشجاعة قال لي: عزم وإيمان
لحظة تحب مواجه اللي تخافه
قال : اختصر بالأسئلة قدر الامكان
معنى الكرم عكس امتداد الضيافة
قلت العفو ودي اسميك يا فلان
قال: إيش توقع .. قلت : عاشق ثقافة
(أسرار شاعر)
لو تفهمين أفكار شاعر عشقتيه
مثل الطفل عادي ولا هوب عادي
لو تكشفين أعماق شاعر لقيتيه
مسرح حقيقي للمثل والمبادي
لو تسألين أعصاب شاعر عرفتيه
حتى الزعل عنده طبيعي وهادي
لو تدركين أسرار شاعر وجدتيه
بأشد حالات الغضب ما يعادي
لو تعرفين أحلام شاعر رحمتيه
لا من سكن وادي يفكر بوادي
لو ترحلين لعقل شاعر سكنتيه
كل التطرف فيه لكن حيادي
لوترسمين إحساس شاعر تشوفيه
في غمرة ألوانه يضيع السوادي
لو تدخلين لقلب شاعر سمعتيه
في كل نبضاته ترانيم شادي
لو تتبعين عيون شاعر فهمتيه
تكره عيونه كل شي رمادي
لو تفتحين أقلام شاعر منحتيه
فرصة جديدة للقلق والسهادي
لو تفتشين أوراق شاعر لقيتيه
إما نهاية شعر أو شعر بادي
لو تنفتح لك نفس شاعر ملكتيه
النفس أصعب مرحلة باعتقادي
نفسية الشاعر هي الجرح والتيه
قمة غروره سهم في كل سادي
نفسيته به لون من كل ما فيه
فادي بها واللي يبيها يفادي
إن قلت لك مفهوم قصدي وقلت إيه
فانت استفزيت بعنادك عنادي
مهما حكى لك شاعر واستمعتيه
ومهما كشف لك سر فالسر عادي
أكبر خطا جزمك بأنك كشفتيه
اللي يحاول يكشفه شخص غادي
يغري التواضع فيه وشلون تغريه
الله وأكبر لا تواضع قيادي
(اهرج)
اهرج تكلم ريح القلب يا صاح
والله ما تندم بقول الصراحة
اهرج وسولف لي عن الوضع ترتاح
البوح عند اللي يقدرك راحة
البوح عطر الحب والصمت الاشباح
ما بيك توجد للتردد مساحة
(حكايات الحنين)
بين انكسارك بالتعب واستقامتك
تسكن تفاصيل الغرام الكثيرة
والدمعة اللي تستره بابتسامتك
تروي حكايات الحنين المثيرة
(ليل .. ومطر)
ليل ومطر وأصوات تحتاج للصوت
وأوراق مبتلة .. ومطلع قصيدة
والساحل الممتد في موعد الحوت
يزيد وحشة والمواني بعيدة
وام ٍ تد في طفلها في ورق توت
وشيخ يطالع في قصاصة جريدة
ومصباح تولد به فراشات وتموت
والوادي الممطور ينزف وريده
وعيون يسرقها الكرى حلمها القوت
وعيون من قل الكرى مستفيدة
وطيور وقفها المطر عجزت تفوت
والليل حوّلها عن اللي تريده
وأحلام شوهها فضا صدر مكبوت
وهواجس لو هي قديمة جديدة
فوضى ضجيج تعقبه صدمة سكوت
مثل الخيال إن شاف فكره رشيدة
(قرار)
يا واقفه والشعر أرض ما تطيق الانتظار
إما ادخلي ببلا هلا وإلا ارحلي ببلا شره
هذا التردد داخلك ما ينتهي غير بقرار
وهذا الصدى من أي صوت من وين حدد مصدره
قدام عينيك المساحات الكبيرة والبحار
وهناك ممدود جسر إن كان ودك تعبره
يا خايفه من أي شي والخوف من طبع الصغار
ما انتي على طول السفر من دون رغبة مجبرة
قلتي .. وقلتي والكلام اللي حكيتيه انبهار
واغلب سواليف الغرام من دون جدوى وثمرة
هاللي تشوفينه خضار ما هو بالواقع خضار
وهذيك غابات الرماح ما هي حقول للذرة
وهاك البعيد المستدير .. تدرين وشلون استدار
وتدرين ليه من البحار يطلع عجاج واغبره
تدرين .. ليتك ترجعين أكيد تهتي بالمسار
كل خلقه الله لشي وأعطاه فيه المقدرة
يا بنت والشاعر عظيم والشعر مثل الانتحار
واجمل قصيد نكتبه تقوم لاجله مقبرة
يا بنت قولي للجميع لامن رجعتي باختصار
الشعر أكبر من طموح البنت أو رغبة مرة
(جرح)
جرح الجسم لو كان بالشاش ملفوف
سهل علاجه .. والخلايق تشوفه
بس المصيبة والبلا مصدر الخوف
لا صار جرح الشخص في وسط جوفه
(حرب الأضداد)
أقدر ولا أقدر وابتدت حرب الاضداد
ما بين ما ودّي .. وما بين ودي
واحترت أنا في موقف غامض حاد
بعثر قراراتي ..ونسّان عدّي
إن جيت أبعلن حلي الصارم الجاد
غطت مساحاته شعارات ضدي
الموقف الغامض تعقد ويزداد
الغى السواحل بين جزري ومدي
وشلون أبفصل معركة رفض وعناد
قامت على استفزاز مزحي الجدي
يوم اكشفت رغباتهم شهوة الزاد
لا قام هذا قال ذاك متغدي
حاولت أنا اجمعهم على رأي ما فاد
صارت قضيتهم قضية تحدي
وصلت إلى المبدأ وتحتاج لجهاد
وأنا انشغلت اكتب قرارات ردي
حتى فقدت السيطرة بين الانداد
وما ظل للمأساة حل بيدي
أقدر ولا أقدر وضحت عمق الابعاد
ما بين ما ودي وما بين ودي
(أشعلت عمري)
نسيت أنا الماضي بلحظة وصولك
لقيت بك نفسي وصدقت وآمنت
يوم القدر قبلك بعث لي رسولك
كنت أحلم بواحد يشابهك جيت انت
ألغيت من قبلك وبعدك وحولك
فجرت زلزالك على واقع اسمنت
أشعلت عمري في حرارة فصولك
كنت انتظر حب خرافي لما كنت
الأرض عطشى وارتوت من هطولك
حان ارتحال الجرح والنزف من حنت
طال انتظاري وانت تسرج خيولك
وقبل انتصار اليأس عندي تبينت
فتحت عيني كحل الرمش زولك
سمعت صوتك .. شفت عينك تيقنت
جيت أتكلم .. وانفجر نهر قولك
بين الثقة والحب حتى تطمنت
طارت عصافير الفضول لحقولك
شفت الحرج في نظرتي لك وطمنت
من شعر راسك لين ماطا رجولك
منحتني فرصة قراءتك وامعنت
يا كامل بالعقل .. نافل بطولك
يا روعتك لا زنت .. واروع إلى شنت !
لا جيت ابسأل وش كثر من سعولك
المح شموخك واقتنع ليش ما أذعنت
تميت حسادك .. وتذبح عذولك
بك عزة العاشق .. وشاعر إلى لنت
عندي الخطا وارد وعندك حلولك
كم مرة حاولت تزعل وهونت
واثق .. واريع راسخ في أصولك
يا وافي موته ولا قولة: خنت
خلاص زان العمر لحظة مثولك
قدرت تصهرني بحبك تمكنت
الموت فقدك .. والسعادة دخولك
داويت لي كل الجراحات .. واحسنت
ما كنت أصدق قبل أعرفك وانولك
إن الهنا .. كل الهنا .. تملكه بنت
(معايير)
بعض المواقف .. ما لها أي تبرير
عاش الضمير الحي والصمت راحة
لازم نحدد للصراحة معايير
من قبل نبدأ في حديث الصراحة
(رأي الحكيم)
قالوا عن الشعر الكثير .. تحدثوا طال الجدال
حطوه بلسم للجراح .. وللرمش صار المكحلة
قالوا .. وقول أهل القصيد ثلثين مضمونه خيال
قالوا .. رسالة للحبيب من دون ما تشعر هله
البعض قال: إن الرثا والمدح هو شعر الرجال
والبعض قال أن الرثاء .. والمدح بادنى منزلة
والبعض قال إن القصيد نبره وفكرة وانفعال
والبعض ما يبغى القصيد حتى يحس بزلزلة
قالوا لما طال الحديث.. والهرج حول الشعر طال
حتى اختفى صوت الرجال دام السوالف مخجلة
من بينهم قام الحكيم .. يفرق حرام عن حلال
توارت شموع الجهل من يوم ولع مشعله
قال: الشعر بالاختصار مبدأ .. وموقف واشتعال
عمر الشعر ما هو جواب الشعر طرح الأسئلة
(جيت كلي)
جيتك معي فوضى .. تلونت باعصار
جمعت نفسي كلها .. جيت كلي
جيتك ذهب .. جيتك هوا .. جيتك غبار
جيتك أسير بين عزي .. وذلي
جيتك معي تهمة .. ومطلوب في ثار
مرهون عند الناس صوتي .. وظلي
جيتك وأنا شاعر فقد كل الأشعار
جيتك طبيعي ما نقص من "ملي"
جيتك بعد غربة .. بعد وحشة أسفار
جيتك حقيقي وإن رفضتين .. من لي ؟!
(سواليف المحبين)
يمطر غلا وارضه تشجر ملامات
واشرب عطش بين الغلا والملامة
اجمل سوليف المحبين باسكات
واصعب نهايات الغرام الندامة
(قطار الصدق)
ليتك تكون إنسان من أجل الإنسان
وتفرّ من ذاتك على شان ذاتك
ليتك تذوق الحب والطهر من شان
تفرق صفاتك عن بقية صفاتك
يا اللي جمعت من البشر كل الألوان
مزجتها .. شكلت منها حياتك
لو كان في فكرك خيالات فنان
والصدق ثوبك والحقيقة عباتك
ما صغت للمضمون خمسين عنوان
ومع كل خطواتك يزيد التفاتك
أدري معاك إحساس وإدراك واشجان
وذكاك يستر ما انكشف من سماتك
يا سارق الأفراح من كف الأحزان
يا جامع من نزف غيرك فراتك
يا إنسان .. آسف .. يا شبيه للإنسان
فاتك قطار الصدق والصدق فاتك
(عسل)
إذا حكت كلامها يقطر عسل
تهمس ولكن همسها فيه اشتعال
نشاطها مخلوط بشوية كسل
مثل الحقيقة لا تلبسها خيال
(خيوط العنكبوت)!
وين الكلام اللي تشجّر كان معنى كان صوت
وين الروايات الطويلة والكتاب اللي قريت
وين العهود اللي تنثّر بالكلام وبالسكوت
وين الأمل دامك صنعته .. والهوى دامي لقيت
وين السوالف والحكايا والقصايد والبيوت
وين الحبيب اللي إلى ضاقت على عيوني نصيت
وين العهد يومك تقول: إني معك حتى أموت
حتى العهد بديت أحس إنك تناسيت ونسيت
وين الزعل يا مشتهيه وملبسه أحلى النعوت
وين السهر وين الزهر وين العسل دامك جنيت
معقول كل اللي حصل رغم الأدلة والثبوت
يصير قدامي سراب ويضيع كل اللي بنيت
معقول كنت أبني وهم وانسج خيوط العنكبوت
معقول كل اللي كتبنا بالهوى جيت ومحيت
(أطراف عمري)
اجمعي اطراف عمري أوجزي كل العباد
تملكين أعشاب صحرا فتشي باسرارها
واصهري باقي وضوحي لا تذرين الرماد
ينتحر عشق الليالي لو تموت اقمارها
جربي أسهل طريقة .. ما أبي غير اجتهاد
بالخطى نحيي دروب دافنين اخطارها
ينتهي المجهول دايم عند لحظات العناد
وتفقد الصحرا صفاها عند رسم اسوارها
باعدي وهج العزيمة عن فحيح الانقياد
رحلة المجهول صعبة .. لو يموت اصرارها
من دمي .. من نبض قلبي احملي ماء وزاد
سامري نفس مداها واضح باشعارها
وانثري كل التحايا بين اسراب الجراد
واكتبي له منك وعد باخضرار اشجارها
يقتل الأشجار وهماً من يظن إنه جماد
لا تقوليها جزافاً .. لو شممتي نارها
ابعدي الاغصان عنها .. انها ضد الحداد
واسألي عنها غموضي .. واحتفي باحجارها
وارجعي إن شئت حباً .. أو تمادي في البعاد
من يريد أيام عمري .. يقتنع باقدارها
(5×5)
الشعر يا اهل الشعر له خمسة أنواع
شاعر .. يهز اعماق نفسك بقافه
وشاعر تمكن من قصيده بالابداع
وشاعر تحصل في قصيده لطافة
وشاعر من النادر يقدم لك امتاع
وشاعر دخل للشعر غصب ولقافة
(نصف الإجابة)
احرق الكوخ واضحك تنبت الأرض غابة
حطم القيد ترجع للمكان الجهات
لو تطاول .. تطاول كان تصبح سحابة
من عطاها تحقق كل حلم النبات
ليه ترجع .. تقدم .. النتايج تشابه
خل عندي يقين .. وخل عندك ثبات
ليت حلم تضمه ما احتوته الكتابة
يزرع الأرض حب ويمتزج بالحياة
لو تحطم .. بوجهك كل موقع كآبة
كان تملك بنفسي موقع إنسان مات
ما لقيت لسؤالي غير نصف الإجابة
من يلملم ذهولي في دروب الشتات
خل عندك طموح وعاند الوقت جابه
ما اقدر أعطيك ذاتي وانت من دون ذات
(جرح وحلم)
أبيك بجرأة الفارس إلى غامر بجنح الليل
أبي جرحك مثل جرحه إلى سدد على خصومه
أبيك أكثر من الممكن أبيك أكبر من التأويل
أبيك إنسان في عقله وفي رمحه حمى قومه
أبيك أوسع من أحلامي أبيك أعمق من التحليل
أبي لك قومة تسوى مراميها مية قومه
أبيك أرحب من الصحراء وأروع من جنون السيل
أبيك إنسان ما تضعف بسوق اللي رفع سومه
أبي يسكن تفاصيلك عبق شيح وشعاع سهيل
أبيك أقوى من الظالم وأبي لك نفس مظلومة
أبي لك عقل لا كابر له القدرة على التضليل
وأبي لك قلب لا عاند ملك نبضات مسمومة
أبي لحظة عطاك أقوى من التعديل والتعطيل
وأبي لحظة رضاك أعلى من الإنسان وهمومه
أبيك إنسان ما تشبه سواك وضعت بالتفصيل
أبي بك صحوة الشاعر .. طموحه روعته نومه
(تكلمي)
تكلّمي ودّي تطير العصافير
من شفتك وتحط باغصان سمعي
هرجك الى منّه طلع دون تفكير
تفز ضحكاتي .. وتغتال دمعي
(شيء).. !!
يا عبرة .. خانها بالحيل تعبيري
استوطنت خاطري وتعيش بافكاري
كن الشقاء والألم ما جرين غيري
وإلا الهنا والفرح ما جالهن طاري
ما فيه أرض وسما ما حام به طيري
واغلب خيول الأسى تجري بمضماري
كان القلق خير .. والله يا كثر خيري
وكان القلق شر ما تحصى أنا أشراري
وكان الألم فيه تكفيري وتطهيري
فأنا جعلت الشقا من أخطر أسراري
وكان السؤال / السؤال أسباب تقصيري
فأنا جعلت الإجابة شعري الناري
ابعد خيال يتلاشى قبل تقديري
واقرب حقيقة أعريها وانا العاري
أنا أتأثر بشي فيه تأثيري
شي أحسه .. ولكن خارج أسواري
شي يتفنن على صحوي وتخديري
بالروح بالدم .. بالأقلام باشعاري
قلق ألم فكر .. ودموع تعابيري
ودي أحدد مكاني وانسف إحصاري
تعبت خطايه ولا تعبت مشاويري
مليت .. ملت حلولي وانتحر ثاري
(التيه)
لا تشتكين .. ومنجل الوقت مكسور
لا تصرخين .. وعج الأيام ثاير
التضحيات تهون في رحلة النور
ودرب النجاح المجد نصفه خساير
حنا توهمنا السفر واثرنا ندور
حتى تعودنا حياة الدواير
نصف البياض اللي نحبه طلع زور
وين الأمل والصدق بالحيل جاير
لا تزرعين أحلامك البيض بالبور
لون عجاج الزيف حتى الضماير
تمسكي باللي بقى فيك مطمور
ما دام كل اللي طلع منك طاير
ما به أمل تمشين في خارج السور
وما به رجا تشكين من شي صاير
تلقين فوق المسرح التيه لك دور
وخلي لرب الكون كل المصاير
(ناقص وكامل)
إذا حضرت بحفلة السيرك والرقص
لازم تجامل .. غضب لازم تجامل
بتشاهد الكامل على كفّة النقص
وتشاهد المنقوص بالحيل كامل
(عنواني)
هناك بالضبط عند الشمس تلقاني
كأنك تبيني .. وقابل كل ما فيني
الصدق والحب والاخلاص عنواني
ماني أغيّر مثل غيري عناويني
ما دامت إنك قدرت تهز وجداني
تعال عندي هلا بك لا تناديني
اللي قدر يرتفع بالحب من شاني
امطر على القلب واحيا العشب في عيني
نصفي معي ليه ما جا نصفي الثاني
اللي بحبه زرع لي ممحل اسنيني
يا اجمل إنسان عند الشمس وداني
دامك تأخرت وش حدك توديني ؟
(السهرة)
أنا الليلة أحس اني حزين ومثقل ٍ بهموم
فراش الجرح يا الغالي تعدّى نور مصباحك
إذا انك ما تبي المسرى أنا باستأذنك واقوم
مابيك تعيش باحزاني وانا ما عشت بافراحك
تقول ابزرع الوردة بسور المنزل المهدوم
واكون أكبر أناني لو غلاي امتد لجراحك
ترى لو طالت السهرة نهايتها تصير احلوم
تعبت أهرب من احزاني من اجل تشوفني ضاحك
تصدق من كثر ما اعطي واقدم صرت أنا المحروم
وانا خايف جفاف الأرض ما يقواه تفاحك
أنا الليلة أحس إني حزين .. وما احس بنوم
يا ليتك تعرف الواقع قبل تستعمل اسلاحك
(شفرة الحب)
ودي أوزّع شفرة الحب للناس
والغي متاهات الردى والمسبة
من جرّب الطهر الحقيقي والاحساس
عاش بمحبة .. وانتهى في محبة
(كذوب)
كذوب اللي يقول بهالزمن خلّك من الاخيار
كذوب اللي يصدقها مغفل شخص يسمعها
كذوب اللي يقول ان الزمن اقوى من الاسوار
إذا ما طاعت الايام نزل هامتك طعها
كذوب اللي يقول إن المبادي تنقذ الاحرار
كذوب اللي يجي يمدح بضاعة امس بايعها
كذوب اللي يقول الصمت نعمة والزمن ثرثار
تسير القافلة معها .. تموت القافلة معها
كذوب اللي يقول السيف ..اماني.. والجواد اعذار
مغفل من يشوف الناس من خارج طبايعها
مظلل من يقول البرد يرحل في وجود النار
مزور عاشق الحكمة إذا ما صار يتبعها
كذوب اللي يعلق لك على شماعة الاقدار
جميع أغلاط ها الدنيا ويطلب منك ترفعها
كذوب اللي يقول المشكلة تنحل بالاشعار
يجي يمدح لك الزهرة ولا من غبت يقلعها
مظلل كل من يركض ولا يخرج عن المضمار
كذوب من روى الاحداث لا غير مواقعها
مخادع من يقول اصبر لما تكشف لك الأسرار
حقايق اقطع الهرجة وقل له وين طلعها
كذوب وتاقف الكلمة بحلقي والحروف كبار
اطيع الكلمة الزلزال ؟! حشى ماني بطايعها
(هذي الحكاية)
غيبتك عندي ترتبط في حضورك
جيت ورحلت ويا كثر شي بالبال
بديت في زلزال واشعلت نورك
وعند الرحيل اطفيت نورك بزلزال
ما اقول لك مثلت واتقنت دورك
بس اسألك عن حب مثل الجبل زال
من يفهم احساسك ويرضي غرورك
بعدي .. ولا يحتاج نضرب لك امثال
من يمسح ادموعك ويغري سرورك
من يحتويك افكار واقوال وافعال
من يقنعك لا من تجاوزت طورك
انك تعود وحكمته طولة البال
من تلتجي له لا انجرحت بشعورك
تقبل عليه بحال وتروح في حال
غيري .. وتذكر لا تبين قصورك
اضحك .. واعده من دعابات الاطفال
وانا اعترف قلبك وروحك وحورك
واشيا كثيرة فيك تشعلني اشعال
وفتحت لي كامل مداك وجسورك
وناقشتني باحلامك البيض وآمال
ونثرت من حولي شذاك وزهورك
وجلستني بظلال وانته بلا ظلال
واذكر الى جا واحدٍ من طيورك
سولفت له والطير للحب مرسال
طير عشق صوتك وهام بعطورك
معذور لو ياقع على الغصن ما مال
هذي الحكاية قبل يظهر فتورك
حنا انتهينا ليش نكذب ونحتال
ارحل معي ذكراك تسمح امورك
ارحل لو ان بداخلك قلب رجال
(عج الأصوات)
يا هيه كل الأسئلة مستحيلة
ماتت بصدر التيه كل الإجابات
الحق فارس ما لقى له قبيلة
والصدق ما يمطر وسط عج الأصوات
(ملل)
ملل بالانتظار الصعب .. يا حلم نبت بالتيه
ملل كل المواعيد الغبية .. كل ما فيها
ملل للرغبة الهشة لا ماتت بين "لا" و"إيه"
ملل لاحلام ما تكبر مثل هقوات راعيها
ملل كل العطا والبذل إذا انه صافح التشويه
ملل كل الهدايا .. لو عرفت أسرار مهديها
ملل للركض والنظرة .. ملل للزيف والتمويه
ملل للأسئلة .. والأجوبة تخذل مراميها
ملل لأحلام مجنونة تسافر في دروب الـ "ليه"
ملل لأكبر عبارات تخلّت عن معانيها
ملل للأقنعة والأمتعة والوصف والتشبيه
ملل لنفوس حاضرها خجل قدام ماضيها
ملل لكفوف ممدودة ما تدرك حكمة الـ"ما بيه"
لو أن الفقر في كل احتمالاتها محنّيها
ملل كل الورق والحبر إذا أنه ما صدق راعيه
ملل لاشعار خانتها عن الغاية قوافيها
ملل للحب للعشق الكسيح وكل ما جاء فيه
ملل لدروب نفرشها .. ملل لدروب نطويها
ملل أكبر من اللي نعرفه وبصمتنا نرويه
ملل كلمة أبيها تحمل المعنى .. ولا أبيها
ملل خيبة أمل .. وأشيا كثيرة والنتيجة إيه ؟
جميع عيون تعجبنا نكحلها ونعميها
(أسراب الطيور)
غرد على كل الغصون واقطف بقايا السنبلة
خل الفرح يجلس معك بس انتبه تجلس معه
جدد صحاري غربتك وازرع بها شوق ووله
ما يغري أسراب الطيور إلا شموخ المزرعة
(غريبة)
غريبة مالك بيدك جميع اللي تبي وتريد
غريبة يسأل المملوك عن حاله من المالك
غريبة في سؤالاتك طرحت الجزم والتأكيد
تبي تسأل عن احوالي نسيت إنه من احوالك
غريبة تعشق الحيرة .. تصدقها وانت السيد
غريبة حالتي عندك تقدمها على حالك
غريبة تذرف الدمعة وانت تعيش يوم العيد
غريبة وقفتك هذي ما دام الدرب لك سالك
غريبة كل ما احبك أشوف الشك فيك يزيد
غريبة كل ما أقرب إليك القاك متهالك
غريبة نظراتك فيني عجزت ألقا لها تحديد
مناي اعرف من عيونك وش اللي صار في بالك
جميع الأسئلة ماتت كرهت الطرح والترديد
سؤال واحد باقي يا أسعد هالبشر مالك ؟!
(صورنا القديمة)
الشمس لو تشرق على صدر غيمة
كان اصبح الإنسان ما يعرف الهم
والأرض لو هي من عطاها عقيمة
استبشرت والجود من خيرها عم
وما ظل بالأنفس مواقف أليمة
ولا بقى مشوار للخير ما تم
ويصير للحظات معنى وقيمة
وتشوف "ولد العم" فعلاً ولد عم
كان انتهت أغلب صورنا القديمة
اللي مزيج الوانها يشبه الدم
لا حقد .. لا بغضا .. وحسد ونميمة
ترجع حقوق الكيف من قبضة الكم
الشمس لو تشرق على صدر غيمة
حتى عدوك لا لقيته تبسم
(برد)
حلم الشتاء وش فيه ذابل ويابس
كنه تربى في خيالات هالناس
برد الشتاء تدفيه بعض الملابس
الموت في برد المشاعر والاحساس
(جراح الأمس)
شي يصيح بداخلي وانت لبيت
وأنا قبلتك والنتيجة علينا
اخطيت يمكن أو أنا يمكن أخطيت
بس التقينا وبقناعة بدينا
لو كنت خايف من عنا الدرب عييت
وما كان للرحلة سفينة ومينا
اللي حدث حسّيت به .. وانت حسيت
إحساس صادق ما اختفى من حدينا
اللي حصل معقول لكنك ابطيت
والا أنا لكن على الوعد جينا
بيدي نزاهة عمر .. بيدك طفل ميت
وقامت ايدينا بالعزا عن ايدينا
اعميت ثم ابصرت .. وابصرت وعميت
واليوم فتحنا بعد ما عمينا
ويوم التقينا ضاع معنى المواقيت
وضاعت جراح الامس يوم التقينا
هل جيت يمكن ..؟ أو أنا محتمل جيت
اثنينا نقرب ونمشي الهوينا
سرنا تجاوزنا عن اللو والليت
وبكل ما يجري علينا رضينا
(صراع)
من خلف سور المستحيل يمتد خيط من شعاع
ومن تحت موج اللاوعي تتنفس اسماك الوعي
ويفتر ثغر الأزمنة وتضيع قدرات اليراع
ومساحة الحرف الجميل أرض مشاعة للرعي
وتذوب من نزف الشفق جميع حالات الوداع
ومن صرخة اللون الدخيل في كف فنان دعي
ليه النجوم العالية تفقد سمات الارتفاع
وتشارك العيد الحزين جميع لحظات النعي
ليه المدى كل المدى داخل حدود المستطاع
ليه المغامر والجواد يخاف من طول السعي
ليه الجنون المندفع ينسى جنون الاندفاع
واللي طرب له مسمعك يمكن يجرح مسمعي
أصل الحكاية كلها صراع يولد من صراع
صدقتها مانته معي .. كذبتها مانته معي
(بساطة)
يا من تقضى رحلة العمر تعقيد
ما فيه أحلى من حياة البساطة
(ربكة) .. !
ما يربك عقول البشر غير ثنتين
موت الضمير وغربدات المنافق
(صوت الحقيقة)
يكفين اجامل واحتمل واحترق عام
واسعد سنينك والضحية سنيني
ما كنت من شانك أحسّب للايام
ولا شعرت بفرق بينك وبيني
كنت انقلب الواقع على شانك أحلام
وفي سحر عينك تايه شوف عيني
كنت احترق في صمت لا نمت مانام
وان نمت من غيرك بلطيفه يجيني
أضيم نفسي حيل ما بيك تنضام
ورضاك عندي من بعد والديني
ضحيت لك والتضحية فوق الارقام
واخلصت لك سددت دينك وديني
واليوم حب الأمس خوّلته أوهام
حيل ابتعدنا شوف وينك وويني
حب ربطنا ذاب دام الهدف عام
ومن واقعك صوت الحقيقة عويني
جيتك مساحة شعر تحتاج لالهام
ومنحت لك نفسي وقلت ازرعيني
(وعود كذّابة)
تخيّل مولد الفجر .. انتصاره .. وانهزم الليل
تخيّل وش أحاسيس الصحاري لا أصبحت غابة
تخيّل دمعة حيرى حضنها العطر بالمنديل
تخيّل موسم الحظ الكبير .. وخيبة النابه
تخيّل دائرة ظلمه غرتها شعلة القنديل
تخيّل عودة المنفي .. شعوره .. لهفة أحبابه
تخيّل كل حبات الرمل وإحساسها بالسيل
تخيّل عن طمأنينة تشع بنفس مرتابة
تخيّل عن ذبول الفكر، ضعف الشعر، موت الحيل
تخيّل عن ذهول إنسان ما يدري وش أسبابه
تخيّل والقلق أرض المعارك والجروح الخيل
تخيّل لحظة الفرحة قريبة .. بس منصابة
تخيّل لو غدا بكره رهين بقبضة التاجيل
يقضي المنتظر عمره ما بين وعود كذّابة
تخيّل.. أو بلاش إنك تخيل.. واختصار القيل
إذا ضاقت بك الدنيا .. وعاندك الزمن .. جابه
(ومضة إحساس)
الله على ومضة الإحساس
وشلون بين البشر تسري
أحيان يفهمك (بعض) الناس
من حيث تدري ولا تدري
(فضول العصافير)
خطوات حبي تبتدي من ميولي
أحب في تفكير واعشق بتفكير
لو شفتني بالحب شخص فضولي
ماحد ٍ تضايق من فضول العصافير
لكن لك الله ما أحب الوصولي
اللي يتاجر في غرام الغنادير
الحب حولي والمحبين حولي
والشر ما وقف صراعه مع الخير
أسمى العواطف بالمحبة طفولي
يجتاح في دريه جميع الأعاصير
أقول ؟ بسكت باستمع منك قولي:
إن الهوى تبيير والحب تفجير
(الدخول من اوسع الأبواب)
تبي بعض الذي عندي ولا تسأل عن الأسباب
لو ان البعض رغم الصجه ما يجهلك تدري به
أنا لا من نويت أدخل دخلت من أوسع الأبواب
تركت السور والشباك للي نظرته خيبة
أنا أحب الهدف واضح وواجه وأكره الكذاب
وأساير من يحب اللعب الين أكشف أساليبه
أنا للرايح.. الرايح، سحاب، وللعدو احراب
بعين أهل الوفا جنه بعين الخاين المصيبة
ما دام إن غايتي حاجه عظيمة حالفرما هاب
ولا أمشي في طريقٍ خِبرت الرجلين تمشي به
كرهت الحب تدري ليه؟ لأن الحب صار إسهاب
جميع الناس تصبح به وكل الناس تمسي به
وصار الحب في غربة لأن العاشقين اغراب
والا وش ينبغي بالحب لا من غابت الهيبة
(سفر)
أحيان اسافر داخلك وامتزج فيك
ما بين تفكيرك وقلبك ودمَّك
اجمل دروبي تنتهي وسط عينيك
وجميعها حولك حواليك يـمَّك
(ليل الشتاء)
برد يلف الأمكنة والزوايا
برق ورعد وإحساس بالصمت والليل
وملامح تدفي برود النوايا
وقلوب ضخت بالعروق التفاصيل
وأحلام صارت للنفوس المرايا
وأحزان نامت في ثياب التعاليل
ليل الشتاء برد وهروب وحكايا
خوف، ورجا، رئة حجول .. ومواويل
ليل الشتاء خيل وحروب وسبايا
نار وشعر ورجال .. صفة معاميل
ليل الشتاء ميعاد رد الهدايا
لا صار ما يصبر على العطر منديل
لا جاء الشتاء فزّت جميع الخفايا
يا وينكم يا جامعين المحاصيل
ليل الشتاء نصر لكل الصبايا
وأكبر هزيمة شاملة للرجاجيل
(فكرة)
متى ما شعت الفكرة براس الفنان
وهي أكبر من ابداعه وفنه ماتت الفكرة
وإذا جت صدمة هزت من الداخل شعور إنسان
ولو هي راحت بسرعة بقى طول الزمن ذكره
وأنا شفت الزمن طير هزيل وصرت له جنحان
وأحس إن الألم سلك طويل وعمري المكرة
ترى بعض العجاج أهون على الطرق من الدخان
وطول اليوم ما يطفي لهيب الشوق عن بكره
وترى أكثر من يخاف من المطر من يسكن الوديان
ومن هو بالعطش مذبوح يشرب موية عكرة
إذا انه ماصدق حلمك فحلمك خله اللي كان
ما دام ان الفرح موجود عند البعض واحتكره
جميل نعلل الفرقا على انه باب للنسيان
وإذا كبرت عزوم الطير ما يرتاح في وكره
تركل العزا للي يحub ولا عشق ما خان
وبعض الناس له قدره تحب وقدرة تكره
وأنا اجمل من عشق قلبي حبيبي ما ترك عنوان
رحل واللي بقى رشة عتابه همهمة شكره
(مرايا)
قالوا من أول وهلة تعرف الناس
طالع ملامحهم تعرف الخفايا
وآنا أشوف (العين) مرآة الإحساس
من صدقها تصدق جميع المرايا
العين غيمة دمع وبروق الأنفاس
جذورها متشعبة بالحنايا
فيها براءة طفل مع لمعة الماس
وأكبر عدو للعين خبث النوايا
(الخيارات الصحيحة)
تجاهلت الخيارات الصحيحة واشتهيت البوح
خذلتك بابشري حاضر ذبحتك في كثر سمّي
تخيرت الطريق السهل ما طعتك وطعت الروح
خذلتك ألف مرة .. وألف مرّة ينتثر دمّي
حكيتني عن حلول واقعية صادقة.. قلت: أوح
وأنا أوحي.. بس لا منك قضيتي قلت: يا عمّي
بلا عقل يحدد لك على أي الجهات تروح
وأنا ما جوز ببلا اثنين .. عمق الجرح مع همّي
أنا اشهد وابصم بعشري.. بأنك صادقة بضوح
وأنا من قلبي المخلص صدقت وخانتي فمي
خلقن الله عنيد وجابك الله في طريقي ضوح
رقصتي في هدب عيني سكنتي في طرف كمّي
أنا ما اشوف في كل الدروب الواضحة مصلوح
ولا أحني هامتي إلا لبوي وزوجته أمّي
يا راحل بالخيارات الصحيحة هو أنا مسموح
يكفّي وابتععد مهما حصل لي لا تجي يمّي
(قسوة العودة)
مثل برق لمع فجأة بليله من ليال الصيف
مثل فكرة خياليه نمت في نفس محدودة
تلاشى قيمة الموعد لا صار الضيف غير الضيف
وتنقص قيمة البارود من تحميه باروده
تمدد يا زمن واشرب لهيب الأقنعة والزيف
وخاصم دام لك مبدأ على غايات مفقودة
ما دام أحلامك الكبرى نمت في تربة التخويف
يصير الأمر يا هونه وفعل الأمر يا كوده
ويغرق مركب الحيرة ما دام إنه بلا تجديف
وتبقى رحلة الأحزان بالأحزان موعودة
مثل حلم لمع فجأة .. تجسّد واقع ما شيف
جميلة رحلة الأحلام لولا قسوة العودة
(اللون الرمادي)
نمشي مع اللون الرمادي إلى وين؟!
ضعنا وجنا توّنا ما ابتدينا
يكفي تعب من رحلة الـ(بين ما بين)
إما اصدقي .. وإلا اكذبي وانتهيــنا
(هدايا سراجي)
حاولت اعدّي كذبتك في مزاجي
وافتش القاموس واخلُق لك اعذار
وأحميك من قسوة مواسم عجاجي
من هو يعيش بظل ما يعرف اغبار
اجمل حروفك من هدايا سراجي
يا ما زرعت بتربتك ورد واشعار
الحين خلك خلف سور زجاجي
شاهد تحوّل موسم العج لامتطار
من خلف هالغبرة زرعت ابتهاجي
وانت تعبت من المشي عدّة امتار
من بعد هذا لا تعكّر مزاجي
جميع ما يبنى على الزيف ينهار
(الجبل)
وقفت قدامه اترجم حروفه
اثر الجبل موطن جماعي للاسرار
كيف الجبل يملك مشاعر عطوفة
اجمل غموض الكون في صدر الاحجار
ملامح التاريخ تسكن اكتوفه
فيه الحقيقة فوقها شرشف غبار
اثر الجبل ما هوب صخر تشوفه
سر الجبل جاوز مساحات الانظار
الله أكبر تمتزج وسط جوفه
اعذب مياه الكون تنبع من النار
يا اللي تسبون الجبل ذي ظروفه
ما هوب جامد ما تشوقون لا ثار
نرقد ونتعب والجبل في وقوفه
ما حس بالارهاق لحظة ولا انهار
من روعته خلا شموخه وخوفه
أشياء قريبة تدركه كل الابصار
تسقط ادموعه لا مسح في كفوفه
على عيونه أو تحمم بالامطار
وقفت قدامه اترجم حروفه
صبري قضى والا الجبل كله أسرار
(جرح قديم)
في ضحكتك فرحة طفل
وبنظرتك دمعة يتيم
كنك فتاة في حفل
ترقص على جرح قديم
(حبيبة شاعر)
بذلت أقصى حدود المستطاع ولا وصلت لشي
وإذا لك رغبة افحاول أبيبها جد هالمُرّة
أبي قمّة عنادك والتحدي والطموح الحي
تدلك للدروب اللي تؤدي لأرض مخضرة
وإذا نادى لك العادي على شان الرجوع افعي"
ما دامك بالطريق الصعب قدرت تثبت الجرة
ولا تتركن على بعض الشجر لوهي تعطك الفي
وشخصٍ ما اعتراض دربك فلا تفيده ولا تضره
وإذا طال الظلام وضياق دربك فالنهاية ضي
وقبل ما ياصلك برد الهبوب اصبر على حره
وإذا قربت لحدود النهاية جاك صوتي: هي
خلاص ارم الزهاب اللي تبقى واكسر الجرة
هناك ابحكي لك ووضح لك وشي اللي بي
واسولف عن كثر صبري على المحار يالدرة
وابعلن ذي حبيبة شاعر مل انتظار.. ودي
معاها حق لو صارت رفيعة راس مغترّة
(كتمة مع شوية رذاذ)
عيّت معي تمشي كذا وعيّت معي تمشي كذا
كل الجهات الممكنة للحل ما فيها نفاذ
وتاهت حلول المسألة في قصة العاشق لذا
قررت أوضح موقفي للصدق والصدق الملاذ
صبري على طول الضباب أول محطات الأذى
وصارت حصيلة رحلتي كتمة مع شوية رذاذ
ليت وعسى والأمنيات اللي تلحف حبذا
القلب منها مستدير والعقل مبعد واستعاذ
هذاك يضحك من بعيد وذا تبسم لي وذا
جالس يراقب خطوتي واحترت من هذا وهذا
أول علامات العمى للعين نوبات القذى
وأنا عيوني مبصرة للصدق ما تشوف الشواذ
بعض العقول مسسمة أشد من سم الغذا
والا العقول الراقية عنوان لرجال أفذاذ
وختامها لازم تصير إما كذا وإلا كذا
لن الحكاية صادرة من ريم والراوي معاذ
(شجر دفتري)
كل ما رميت وصفك ضاق الكلام
تسقط أوراق حريّ من شجر دفتري
وصار بين التشاؤم والتفاؤل خصام
المداد (المعـرّي) والقلم (بحـتري)
(زهور العمر)
ضاق الكلام ولا بقى شي ينقال
وأنا عجزت القى جواب لسؤالي
غير الهموم وضيقة الصدر والبال
والمستحيل اللي سكن في خيالي
وحلم قديم ما تحقق ولا زال
يزورني مثل السهر بالليالي
الله يا درب عليه السفر طال
يشبه جروح الوقت مع طول بالي
من وين جيتيني؟ وانا وسط الأهوال
محدٍ معي .. جالس بعيدٍ لحالي
انثر زهور العمر ما بين الأطلال
جريمتي صدقي .. وذنبي مثالي
يا هيه .. وش تبغين في راس رجال
عمره تبعثر في سبيل المعالي
يا هيه كانك ضيف بعطيك فنجال
وكأنك خوّي برحلي لا تبالي
ضاق الكلام ولا بقى شي ينقال
يمكن تكونين الجواب لسؤالي
(الضباب)
مدري انتظار الغايبية يصدق ولو طال الغياب
والا شتات الحاضرة يقدر يقاوم ظلها
أول سنة.. ثاني سنة.. ثالث سنة.. وسط الضباب
وأنا انتظر يمكن تجي .. وإبنتظر لعلها
غابت مثل نسمة هوا هبت على سطح التراب
مرت على كل الشجر .. اقسم بربي كلها
كانت هدية من خيال لو انها عين الصواب
هي صاحبة عقل كبير .. بس الجنون اخو لها
زود على كثر الحيا كانت جريئة ما تهاب
لا احتارت أنا في مشكلة .. جتني ومعها حلها
ما هي مثل كل الحريم.. مكياج وعطور وثياب
رغم أنها حتى الجمال خلا النساء.. واجتلها
في صوتها نغمة مطر .. وبضحكها رنة سحاب
تمل من كثر الحكي .. والمستمع ما ملها
الله على ذاك الزعل اللي مغلف بالعاتب
لا قلت له حقك علي.. ضحكت وقالت: حلها
(تناقض)
هرجك تناقض مع سواليف عينك
تحكي بشي ونظرتك تحكي بشي
ما املك دليل بالتناقض يدينك
بس لا هدا صوتك حكت عينك شوي
(رجع الصدى)
كوني حقيقة للملا .. وابتلي طيف
قدام عيني لا عبرتي مجرّي
اللي أشوفه من مزاياك ما شيف
كوني مثل مابيك خيري وشرّي
إن كان لك عنوان واسم وتعريف
جميع ذولي مزقيها ومـرّي
من قال إنك في حياته وهج صيف
فهو تقل لك من أحاسيس حرّي
واللي يقول افداك بالعمر تسويف
رجع الصدى للي يحرضّك ضبّري
واللي يجرح مسمعك بالتواصيف
ماهوب عاشق .. من عشق ما يعرّي
جزيت في نفسك جميع المواليف
وانا معك طول السفر ومتدري
حتى اكتشفنا إن المشاوير تزييف
أنا مقـرّك .. وانت نفسك مقرّي !
(حلم البنفسج)
يوم انقطع حبل الجفا من ريح وصلك طاح ليل
حتى دنت كل العناقيد البعيدة واستوت
والشمس في كبد السما حنّت على جفن المقيل
ولفت علي خصر الموعد محزم ذهبها والتوت
يمكن تجي لا، انت جيت من فوق صهوة مستحيل
بس الظروف بعرضها وبطولها كيف انطوت
لما سكن حلم البنفسج في خيال الزنجبيل
فرّت طموحات بعاد لاكثر من البعد وقوت
كيف احتوتنا الدايرة لما تفانا المستطيل
لما نويت انك تجي حنت لك الأرض وهوت
وعدك خرافي الوصول حتى نويته بالأصيل
والأرض وين جبالها من تحت رجليك استوت
ياكثرها ياكبرهارا وانااللي كنت ارجي القليل
الله عطاني بنيتي .. والنفس تلقى ما نوت
(مسرح الهمس)
تشرق حروف الفجر من ميسم الشمس
والورد يمزج فرحته مع عطوره
والهمهمة ترقص على مسرح الهمس
والحب يعلن للخلايق غروره
والعين نظراته تمازج مع اللمس
تخلع عباءات الخجل والمشورة
اليوم في جل التفاصيل مثل امس
ينزف طهارة واغلب الناس عورة
(أعراس الدهشة)
لأجل طبعي ثلاث سنين تدرس عن طباع الناس
جهود غير عادية بذلتها وأنا عادي
زرعتي حقل للبسمة وقاومت جفاف اليأس
صنعتي للجبل هيبة وأعدتي الظل للوادي
وقلتي قاوم احساسك وأنا مسكون بالاحساس
هجومه وانتصاراته بدت لحظات ميلادي
وصارتك وقاومتني وسميتك قوية باس
وقلتي قبل ما انهيها تذكّر أينا البادي
تعبتي باجتهاداتك وعلم النفس لك مقياس
بدت تسري قوانينه على المشروب والزّادي
عطيتك كامل الفرصة لعلك تدخلين الراس
هناك أعراس للدهشة وحرب جوها هادي
احس ان الخطى تاهت وذاب الحرف بالقرطاس
علوم الكون ما تهدي ولكن زينا الهادي
أنا يكفيني تفكيرك وعلمك عن طباع الناس
جهود غير عادية بذلتها وأنا عادي
(يامرحبا بالسيل)
تفضل قرّت الصحراء هلا .. يا مرحبا بالسيل
تحدّر بالثرى كلك مثل ما همت بك كلي
سحاب وساقتك صدفة رياح الحظ بأخر ليل
رقص لك بالفرح شيحي.. وغنى بالأمل فلّي
تباهت بك عصافير عطاشي والزمان ابخيل
تباشير الفرح برقك قبل ما الرعد يوصلّي
تفضل يا هلا واقδε من أحلاصي وصبري هيل
على أول ما انتشر عطرك تراب الأرض مبتلي
أنا من كان يوصلني وأنا اللي مبعد بالحيل
نديمي بالسهر ناري خويي بالسفر ظلّي
وبعد ماجيت يا أجمل فصولي واصهلت بك خيل
تجسد حلمي الأخضر.. حبيبي إيه .. لا .. خلّي
أكيد الوقت عاندني قبل ما القاك ذقت الويل
كأن الحظ ناسيني وتو الحظ يفطنّلي
تعال انثر تفاصيلك تعبت من السفر والشيل
تعال نعيش بالحاضر وخلي الماضي يولي
هلا بك رايح يغري طوال العمر بالتحليل
هلا يا حب ما عمري لقيته غير بـ الهلي
(رجولة)
الحقد علة والحسد يذبح الشخص
والصدق نعمة .. والتسامح رجولة
(أسئلة)
كل ما جيت برقد صاحت الأسئلة
ليش هذا يصير وليش ذا ما يصير؟!
(يا بحر)
يا بحر قلّي عن مواقع موانيك
ما عاد للرحلة والابحار غاية
يا بحر عطني للأمل خيط واعطيك
ربيع أرضي والسحاب ابسمايه
ما لي هدف مليت من رحلتي فيك
باعز ما تملك طليتك كفاية
تتعيني أمواجك وتوحش مساريك
يكفي.. متى تنهي فصول الحكاية
يا بحر أنا معذور لو قلت ما بيك
يا آية.. في كل ما فيك آية
(نزيف الجرح)
يا جروح الشعر والاحساس ثوري
ويـا نزيف الجرح واصل لا تطيب
ويـا غرور صار يسخر من غروري
العجيــب إن الزمن كله عجيب
كــل ما جلت في عقلي أموري
اكتشفت أني على نفسي غريب
استشير الناس وألقى الحل شوري
هل يصيب الخل وإلا ما يصيب؟!
يستغيث الصبر ما يقطع بحوري
القريب بواقعي ما هو قريب
يستريح العمر في موقف ضروري
والمشاعـــر للمحبـــة تستجيب
من عرفت ان البكا يجرح شعوري
استجيرك من دموعك يا الحبيب
(اختصار)
باختصار وبالمفيد وبالبسيط
شاعر ممنوع عن كثر الحكي
الذكي في وقتنا الحاضر عبيط
والعبيط بوقتنا الحاضر ذكي
(جرح شمالي)
كل ما لاح برقٍ في عباة الشمال
تنتصب ذكريات وافية واختفي
واستلذ الهواجس بين صفر الدلال
جاهزاتٍ جميع وجمرهن ما طفى
ذكريات توارد والحضور الرجال
وكل صدر تنقض بالمحبة دفي
وامطرت ذكريات وداخل القلب سال
وادي من ورا "حايل" ورويت "نفي"
ودارت أحلى القصايد والبخور الغزال
والمحب ان تعطر بالغلا يكتفي
كل ما هاض عاشق بالحديث الزلال
زان جو القلوب المغرمات وصفي
ذكريات حسبها كل جاهل خيال
وش غنيمة خلّي البال غير النفي؟!
كل ما لاح برقٍ عدت لاربع ليال
اشتعل واتجمًّر لجلها واحتفي
شفت فيها جمالٍ غير كل الجمال
اخطر الحسن واضح واصدقه مختفي
السعادة قصيرة في ربوع الشمال
وكل جرح شمالي للمشاعر وفي
(أكبر من الغلطة)
أكبر من الغلطة تسرع قرارك
كدرتتي .. وانت عسى ما تكدرت
نسيت طهر الثلج واشعلت نارك
وارجعْتني للخلف.. وانت تأخرت
راع الخطا ليتك تركته يشارك
حاكمت أجمل ذكرياته .. وقرّرت
فرحت من حرصك لرد اعتبارك
لكن بها الأسلوب وشلون فكرت؟!
مبدأ الإساءة منتفي واحتقارك
تدري وانا ادري يا عزيزي تضرّرت
ادري نزيف الجرح سود نهارك
وإن الألم داهمك حتى تخدرّت
حتى الرسالة نبضها رد شارك
لمحت فيها للنهاية وكرّرت
واليوم مر شهور حسب اختيارك
إن كنت من كل الروابط تحرّرت
أو كان بُعدي يسعدك جيت ابارك
لو ان بُعدك جرح مهما تصبّرت
وكأنك تبي اللقيا .. انا بانتظارك
يا لله عسى ردك مثل ما تصوّرت
(طفل يصيح)
في داخلي طفل ٍ يصيح
وانا من صياحه وجل
عنيد مغرور وصريح
مجنون متغطرس عجل
وان كان تبغون الصحيح
هالطفل عن مية رجل
(هقوة الشوف)
دام المدى الواسع كفى هقوة الشّوف
فالحيرة اللي ضاهدتني تلاشت
الصدق والعفة لفو عندي ضيوف
ونفوسهم في سيرة الحب جاشت
واسطورة الحرمان والشك والخوف
راحت لو انه للمعاليق ناشت
كل التعب من بعد لاماك مخلوف
وجميع طلقاتٍ ضمنته وطاشت
طلعت من بين الجراحات معروف
ضحكت .. والأحزان زعلت وهاشت
بالأمس وصفي كان من دون موصوف
واليوم نفسك لأجمل الوصف حاشت
كنت الغريب الصعب واصبحت مألوف
تعيش وأيامٍ سعت فيك عاشت
(التضحية)
صبرت سنين ما قلت الصراحة
عطيت الوقت والأيام راحة
منحتك كامل الفرصة ولكن
أشوف اليأس يحتل المساحة
شربت المر من سود الليالي
أحسب الليل للعشاق واحة
لقيت الليل تهزا بي نجومه
ومن حالي بدا يسخر صباحه
يا كم ضحيت لو تدري من أجلك
دفعني الحب ودروبي مباحة
من أجلك كل طبع ما يسرك
دخل حبك على نفسي وازاحه
حياتي ودي اشرح لك حياتي
يذوب الهجر من نور السماحة
حبيبي الصمت عذبني.. ولجلـك
صبرت سنين ما قلت الصراحة
(زلزال الكلام)
الصمت زلزال الكلام
كاسح مدمر لا انفجر
لا ضج في وسط الظلام
ما هاب من ناس وحجر
(ربيع العمــر)
قالت اوصف لي مشاعرك بصراحة
وارسم الأشيا مثل ما انته تشوفي
لا تجاملني ترى بالصدق راحة
واعرفك بالحق للاحباب توفي
قلت فيه انسان.. يوصف لك نجاحه
أوصفك وشلون .. يا سعدي وخوفي
خالقك ربي بلا حدود ومساحة
يا حقيقة فيك روعات الطيوفي
الهنا .. والسعد انتي والسماحة
وصف حسنك فوق ادراكي وشوفي
يا ربيع العمـر يا نسمـة رياحة
يا جمال تستحي منه الوصوفي
لذة الممنوع والأشياء المباحة
ولهفة الاقبال .. وآلام العزوفي
انتي فوق الحرف وحدود الفصاحة
كل حرف يموت من دونك .. كسوفي
كل وصف يصير في غيرك ملاحة
لكن انتي فيك تشريف الحروفي
اعترف بالعجز عن وصفك صراحة
يا وحيد الحسن قدر لي ظروفي
(ليالي صمت)
تدري بأن النبض له صوت مسموع
يكفي بعضها عن ملايين دمعة
كم قلب من حزنه بكت لجله ضلوع
وكل الجوارح صوتت عند سمعه
وتدري بأن الحب قسري ومشروع
أقسى الألم كتمه حياءً وسمعه
وتدري بأني ما تولعت بأسبوع
وما نيب من يهوى بجمعه لجمعة
بيدي قتلت الكم في خنجر النوع
واخترت سلة ورد واختترت شمعة
ومشيت في دربٍ به الشوك مزروع
اطمع بورد الحب وأحلم بجمعة
جيتك ليالي صمت تحتاج لشموع
ما نسقت في حبك ورا نفس طمعة
(وادي السلك)
سبحة جنونك ولّعت بالأصابع
سال الخرز وامطر على وادي السلك
انتي وانا من دون ثالث ورابع
نبني دول ونصيغ دستور للملك
(حكايـــة)..!
كانت أهدافي بعيدة .. كانت دروبي طويلة
ضاعت سنين المسافر في مشاوير المحال
ما شكيت ولا تعبت .. وكانت حمولي ثقيلة
شلت شيٍ ما يشيله ألف واحد بالرجال
كنت فارس في عيون الناس وعيون القبيلة
كنت حاضر بالواجب من قبل قولة تعال
كنت عاشق للأماني .. والأماني مستحيلة
كانت الصحراء حقيقة .. والسما فوقي خيال
كنت أدور في دروب العشق عن بنتٍ جميلة
مو جميلة.. كان قصدي كنت أدور عن جمال
كنت أبيها بالمواجب كنها النخلة طويلة
وان لفحني حرّ قيضي .. شفتها أحلى ظلال
كنت أبيها زيت حارق ينسكب فوق الفتيلة
لين فاح العطر منها واجمل الحب اشتعال
كنت أبيها عبقرية تقتل الأحزان غيلة
كنت أبيها حاتمية .. عند لحظات الوصال
كنت أبي ليلي نهاري .. والنهار يصير ليلة
عندها .. وأيضاً أبيها مدمنة حب وجدَالَ
كنت أبيها تحتويني مثل عصفور وخميلة
كنت أبيها ترتفع بي مثل حرّ بالجبال
هذا مجمل للحكاية .. والحكايات الجميلة
دائماً تبدي بصدفة .. دون تزييف انفعال
اختصرها .. اختصرها لاجل هالعين الكحيلة
واقْبليها يا أعز الناس .. واصعبهم منال
(عابــــــر)
عابر وخطواتي مواقع للازهار
عابر خيالاتي مواسم سحابة
عابر وبهدي للزمن كل الاشعار
نزف القلم هم الورق والكتابة
عابر وابنسف في شراييني إعصار
جربت أنا الغربة وشفت الغرابة
عابر بلا تفكير مليت الافكار
ومليت من طول الشقا والكآبة
عابر بدون أسرار هو باقي أسرار
حتى الألم صارت دروبه تشابه
عابر وزادي بالسفر حب الاسفار
عابر طريقي بين صحرا وغابة
عابر وابنهي مرحلة نضجي الحار
عابر وابلغي من عذابي عذابه
في تربة الغربة نبت عندي اصرار
وعمّا يقول الناس ما املك إجابة
عابر وإذا قررت ما احب الاعذار
ويكفين وصف البعض بانسان نابه
تعليقات
إرسال تعليق