كنا ببيوت شعبية .. احمد الناصر الأحمد
كنا ... بــ بيوت شعبية
مليانه حــــب وحـــنية
إبيوت ماهــــــي كبيرة
لكن بالراحــــــة ممليه
اكبرها اللي بحوشه نخله
والا اللي بحـوشه عبريه
يازين الجلسه بظــــلاله
بالصيف بتال العصـــرية
لامنك فليت بساطــــك
وجاب اخـوك الزمزميه
واخــتك جابت ماء بارد
ومعها تميرات مــدحيه
واول مايذان للمغــرب
نركض للمسجد رجليه
منازلنا كانت شـــــرحه
بسمنت وطــوب مبنيه
وجدرانه مصبوغه بويه
وسقفه اخشاب بحـريه
بغرفها معلّق مــــراوح
وبالحوش محلا القعادية
نجلس جميــــع ونسولف
وناكل من نفس الصفرية
ونشلق جـــرو ٍ وجحيحه
من سوق الخضره مشريه
ومحظوظ راع الكنديشن
اللي تسمى صحـــــراويه
وان جانا ضيـــف نهلي به
ماندري به قبل الجــــــيه
نستانس لامنـــه جـــــــانا
مــــرحب فيه ويالله حيه
واذا خلصنا من السمرة
نرقــــى للطايه الفـــوقيه
ونلقى المطارح مصفوفه
مفروشه في وسط طويه
تنام الاخــت بجنب اخته
والولد فــي جنب اخــيّه
وان طالت علينا السهرة
نرقــــد من فوق الزوليه
وجيران يالله من فضلك
كـــــــرم ونفــــوس وفيه
مانفـــــرقهم عــن اهلنا
جيــــران بنفــوس حــيّه
كنا نعــــــرف كل الحارة
وكل ٍ يـــــــرافق خــــويه
ونركــب جميع ٍ بالمــوتر
عند الـــــروحه والاالجيه
كنا فعــــلا عيله وحـــده
فينا فـــــــزعات وحمــيه
هـــذي هي حالتنا منول
ذي .. عيشتنا الاولـــــيه
عواايل مسكــــونه طيبه
تسكــــــن ببيوت شعبيه
احمد الناصر الأحمد
احمد الناصر
تعليقات
إرسال تعليق