(مطر وعطر) إصدار مُحدث .. الشاعر احمد الناصر الأحمد

( مطر .. وعطر )
قصائد ذاتية .. وجدانية
احمد الناصر الأحمد
بسم الله الرحمن الرحيم
مقدمة
بعد أن شيّد الشاعر أحمد الناصر الأحمد في ديوانه «الأسوار» عالماً شعرياً نابضاً بالوجدان والذات، يأتي «مطر وعطر» امتداداً طبيعياً لتلك الرحلة، لكنه يفتح نوافذه على القصائد التي ظلّت متناثرة خارج ذلك الأسوار، لتجتمع اليوم في كتاب واحد يحمل روحاً واحدة وإن تعددت محطاته.
في هذا الديوان تتعانق رهافة الإحساس مع صدق التجربة، فتنساب القصائد كما المطر حين يلامس الأرض، وتبقى في الذاكرة كما يبقى العطر بعد رحيل الورد. إنها نصوص كتبتها الحياة قبل أن يكتبها القلم، فحملت شيئاً من الفرح، وكثيراً من الحنين، ومساحات واسعة من التأمل والبوح الإنساني.
«مطر وعطر» ليس مجرد مجموعة شعرية، بل محطة جديدة وهامة في المشروع الشعري لأحمد الناصر الأحمد، تؤكد أن القصيدة الصادقة لا تحدها الأسوار، بل تمضي دائماً إلى القلوب المتعطشة للشعر الحقيقي.
مدخل
بين المطــــر والعطـر اجمل علاقة
يذوب فيها الشعِر مابين الالحــــان
عاش احمد الناصر فصول الصداقة
وترجـــم تفاصيله قصايـــــد بديوان
محطات القطار
لاصــــــــارت الـدنيا مسار
والمُستقر الآخـــــــــــــرة
اضبط محـــــطات القطار
والبوصلة للباخــــــــــــرة
واحــرص على دينك وغار
بأول شبابك وآخـــــــــــره
خلك مـــــع الله في إتجار
هــذه التجارة الفاخـــــرة
اعمل لها ســــــــر وجــهار
في كل جهـــد ٍ ذاخــــــره
جـــــــــرّب وتشعر بإنتصار
ماهــــــــي علـوم ٍ ساخرة
ياحــــــظ من حط الشعار
المستقر الآخـــــــــــــــرة
نصيحة احمد
يا إنسان يارجّــــال ياشيـــــــــخ يابيه!
دنياك درب واحـــــــــد ٍ دون عــــودة
العمــــر خيط وكـــــف الاقدار تطـويه
وتمضـــي سنينه بين نطــــفه ودودة
تركـض حياتك بين الامــــــواج والتيه
والنفس قِــــــدها مانجــح من تقوده
ابعـــــــد عن دروب العتب والمشاريه
ولاتصــــير نفسك من رداها حقــودة
ولياك تحسد شخص مـــولاك معطيه
ما يفلحون اهـــــل النفوس الحسودة
وحث القــدم للمــــرجلة فـي خطاويه
وسيرتك خلّه بالحيـــــــاة محمــــودة
و الـ "لا" تحتاجه مثل حاجــة الـ "إيه"
غلطان مـن واعـــــــــد بشي ٍ يكـــــوده
واذا وعـــــــدت إنسان يلـــزمك توفيه
وكل واحـــــد ٍ يعرف مــداه وحـدوده
ونصيحة احمـــد فــي نهاية قـــــوافيه
كلمــــات من قلبــي اليك معــــدودة
اقــرب من الله وافعل الخيــر ترضيه
وابشـــــر بفضـل الله ولطفه وجــوده
العثيم وابوصدام
هذي بريــــدة كم تباهت بـ العثيم
شهم ٍ بفعل الخــــير عطّــر سيرته
كريــــم للعــــاني ولـ المحتاج ديم
ولجل الوطــــن شفنا وفاه وغيرته
ابوفهــــد وافـي ومحبـــوب وكريم
فيه التواضـــــع مـن نقـــاء سريرته
وفهيد ابوصــدام في حـب القصيم
يسأل وســــــط لبنان عـن عشيرته
إشتاق لـ بريـــدة وهــو بخير ونعيم
( ياحّول ياللي ..) قالها عــــن ديـرته
توّك
لياك تستغرب من الوقـت وش فيك؟
وكان انت مستغرب مـن الحين..توّك
اللي منـــــول صاحـــب ٍ لك مصافيك
ماهـــي غــريبه لوتشــــوفه عـــــدوٌك
وماهــي غريبـــة لوغــــدر بك بناخيك
واذا لمست الـــــورد بيــــــدك تشـوٌك
واللي على جـــــــوّك ودربك مخـاويك
تلقاه ماهـــــو فـي طـــــــريقك وجوٌك
واللي حفظ هــرجك وجمّع حــكاويك
تلقاه مــع غيــــــرك بهرجـــــك تسوّك
مثل اختلاف الناس حــــول الصعاليك
متخالفين فـــــي نـــــــزولك/علــــــوّك
فــي هالــــزمن مهما تسامت مباديـك
يشغلك ناس ٍ تنزعــــــج مـــن سموًك
ولاتقارن الحاضـــــــر بمقياس ماضيك
انس السعف ومــن السمر شب ضوّك
لياك تستغرب مــــن الناس وش فيك؟
ان كنت مستغـــرب ومحــتار تــــوّك!!
جنون الحب
عتابك نبضة اسرار الخفوق ونشوة المشتاق
عتابك ياكثر صـــدقه وياحـــبي لمنطــــــــوقه
عتابك مـن هطل في خاطري وابتلت الاوراق
حلفت الحـــب من بعدك فلااعرفه ولا اذوقه
كبيرة .. ياكبيرة في جـــنون الحـب والأخلاق
يافتنة شاعـــــــــ،ر الدنيا هواه ورغبته.. ذوقه
اذا غــرتي تضيق الارض والدنيا ..وكلش ضاق
لانك سابقه ماقــــد لقيتك يـــــــــوم مسبوقه
كذا احبك جنون وغطرسه..لحظة جفا وعناق
كــــــذا احــــبك ثبات الوقـت والايام مسروقه
انا مـــدمن وضوحك ماابي كذب وريا.. ونفاق
انا اعـــــــرف الحقيقة لوتجــــي نية ومسلوقه
انا داخــــــل على عيـونك احبك والهوى حرّاق
لانك للوفاء والحـــــــــب والاخـــلاص مخلوقه
حـــقوقك يابعـد كل النساء .. يالهفة المشتاق
حفظها خافق ٍ مـــــــن يـوم حـبك فاز بحقوقه
ذلول الصمت
لاتعذلـــون اللــي تــولـــّع بالاطـــلال
نديمـها بالسـر كيـــف افطـــنوا له؟!
راكب ذلول الصمت طـــرقي ورحّال
الشعر جيشه والقـــوافــي خيــــوله
ياطـــــــول بال الصبر يابعض الازوال
ياوسع صــــدره يالنفــوس الزعـــوله
انا لـراع الصــــدق والحــــــــب ميّال
اللـي ينـــوّخ للمــــــــراجـــل ذلـــوله
هــــــــذا رفيـــقي للثقيـــــلات شيّال
ريف لمن عــرفه ومن عاش حـــــوله
انا اعــــــرف الوضع مبطي .. ولاازال
امشي مــــع دروب الحيـاة المهـــوله
اول بدايـــات العـــداوات الاهمـــــال
واكبر ضحاياه النفـــــوس الخجـــولة
وسوء النـوايا عـــــج .. والشك زلزال
اصعب حـــرايقها الحـلول العجــولة
بعض المشاعـر صعب تحكي وتنقال
واصـــدق شعور ٍ مستحيل ٍ نقــوله
يوم الرحيل
ياســـرعها .. تمضي الحـــياة الزايلة
عصره ذبـــــح صبحه بسيف القايلة
والشمس تقـــرب كل يوم ٍ للمغيب
عينه على يــــــوم الرحـــيل إتخايله
كم فرّقت من شمل ناس ٍ عايشين
مـع بعضهم .. كـم شتت من عايله؟
دنيا كفانا الله شــــــر احـــــــــداثها
واحزانها لـ اهـــل الحظـوظ المايلة
عندي كلام ٍ قلت بعضه في وضـوح
وبعضه وسط صـــدري ولاني قايله!
القلق والسكينة
لاتسألين منين .. او رايـــح لـ فين؟
انا مزيـــــج من القلــــق والسكينة
انا المسافر مهـــــرتي دمعة العين
وانا المقيــــــم بضيقتي بالمـــــدينة
ربطـت قلبي فـي عقــــول المجانين
ومشيت في درب الرجــال الرصينة
انا الشمــــوخ اللي يحب المساكين
ولـ اهل الوفاء والصدق باسط يدينه
انا احمــد الناصــر الأحمــد ويكفين
انـي اعيش احمــد بزينه .. وشينه!!
خرافية
خرافـية عواطفها..مشاعرها لهـيـب جنون
اذا تـحكي خرافـية.. واذا تـصمت خـرافية
تقنن كل شغلات الحياة وتـنسـف الـقانون
تكلم عــن قـضايا الـعقل بأفكـار ٍ جـنـونـيـة
تناقض ثم تـتـآلـف وتمــزج لون داخـل لون
تـفنن ترســـم الـلوحة.. تـقـدمـها خـيـالـيـة
تشيطن في خشونتها وتقهر رغوة الصابون
تسلطن في نعــومتـها الين تـصـير مخـفـية
اذا خشيت فــــــي عقله اضيع بغابة الزيتون
واذا خشيت في قلبه لقيت امـــطار وسمية
عظيمة تمزج الشك الكبير بجرعة المضمون
بـــــــريئة كنها طفل ضحــــك بيديه عـيــديـة
هي انسية/على كيفه/ تحدد وش تبي وتكون
لوإني اغلب الأحيـــــــــان اشك تكون جنية !!
خيال هبال مع عقل وثقل مع شيطنة وجنون
اذا عقلت ميـة لميـة..وإذا انجنـت ميـة لمية
مسرح الهمس
تشرق حروف الفجرمن مبسم الشمس
والــــــورد يمـــزج فرحتــــه مع عطـوره
والهمهمة ترقـص على مسـرح الهـمس
والحــــــب يعلـن للخـــلايــــق غـــــروره
والعين نظــــراتـه تمــازج مــع اللمــس
تخلـــع عبـاءات الـخجـــــل والمشـــورة
اليـوم في جـــل التفاصيـل مثــل امـس
ينـــزف طهــارة واغلــب الناس عـــــورة
يارب
ياعالم مكنون صدري وانت عـــــــــلاّم الغيوب
يامدرك اسباب الالم والحـــــزن وانت علاجها
عبدك لجالك يرتجي عفـــوك وغفران الذنوب
ولفيض جــــــودك طامع ٍ ولرحمتك محتاجها
فضلك ربيع لخاطــــري وارضاك راحة للقلوب
ويالله بدرب هــــــدايتك نفسي تحفظ سياجها
وعن كل شي ٍ يغضبك يارب ساعــــــدني بتوب
النفس مـــــــــن عصيانها تاهت بغب امواجها
يارب تاهت خطـــوتي بين المسالك والدروب
عسى طريق الحـــــــــق دربي .. والهداية تاجها
يارب انا عبد ٍ فقير يسبح بلجات الخطــــــوب
ماينعرف مـــــــــدخالها .. ماينعرف مخراجها
يارب تستر ضعف عبـــدك وانت ستار العيوب
احتاج لك ياخالقي .. والخلق مانحتاجــــــــها
يارب انا الوذ بحماك عــــن الشدايد والكروب
وعلى السلامة دلني لاتهت عـــــــــن منهاجـها
ويارب حسن الخاتمة لازاد ضعفي والشحوب
ويالله رضاك ورحمتك من قبل كتم إسراجها
الجحادة
بعض البشر.. عايش حياته بصندوق
مُغلق .... ولكنه مــع الناس .. عايش
مبسوط متضايق .. سعيد ٍ ومخنوق
احيان هادي حيل .. واحيان شايش
محتاط .. مايدري بخافيه مخــــلوق
عايش بــــدون ابواب .. وابلا درايش
يمكـن بوسط الصمت مرتاح ويروق
باله .. ويحسب راعــي الهرج طايش
مـن كثر كتمانه .. تمرّد على الذوق
ومـن الجحادة يختفي بالحشايش !
العقارب
هــي تجــــــ،ربة مافيه غالب ومغلــــــوب
وش يصقل الإنسان غير التجــــــــــــــارب
وشلون اعــــــدل وضع والوضــع مقلوب؟
وشلون اعلّـــــم شخص والشخص هارب
واجــه اذا عنــــــدك قناعـــــات واسلوب
وكانك تحـــب بصدق حــارب .. وحـــارب
ياليت تقنعني عــــــن الـــــــذنب واتــــوب
ان كنت مـــــذنب وانت مــالك مـــــــآرب
او ليت تفكيــــرك اذا كــــــان معطــــوب
تصلـــــــح عطــــب فكـــرك وسدد وقارب
على الغلط مانيب مجبــــر ومغصــــــوب
اقــــــــولها هالحــــــــين ماني مــــــوارب
دامك كسرت الكوب فـ اشرب من الكوب
وعندي سلاحــــي وافهمن يالعقــــــــارب
والله ماذل النفس مـــــــــن شان رعبوب
ويشهـــــــــد على فعلي طـــوال الشوارب
حديث الورد
يافرحـــــة الهاجس وعطــــر التعاليل
واجمل هـــدايا واقعي مــــــن خيالي
ياعــــــــــذبة الاحساس يانسمة الليل
مـــــن يوم جيتي بان فــــــــرق الليالي
كان السهـــــر قبلك همـــوم وغرابيل
واحــــــزان تاكل من عنا الوقت حالي
واليوم معك وفيك صرت اختلف حيل
معك انتهى حــــــــزني .. ومرتاح بالي
غرقت مــــن حـــــبك بسيل التفاصيل
ماكـــــــــن غيرك بالمحبة طــــــــرالي
معسول هــــرجك مثل وبل المخاييل
عــــذب على سمعي على القلب حالي
صــــوتك حـــــديث الورد بحة مواويل
يشعـــــــل حنيني يرتفـــــــع بإحتمالي
والضحكة اللي تذبــــــح القلب وتهيل
لاضقت بظــــروفي تصيــــــر الدوا لي
كنت اتمنى واحــــــــــــــد مثلك يخيل
على سماي ... ويستفــــــــز إشتعالي
والحين طاب الفكــــر يامسرج الخيل
لـــــدروب سلمي مـــن معارك قتالي
باكتب قصيـــــد ٍ فيك من قبل ماقيل
دامك حـــــلالي .. فالقصايــــد حلالي
تماديت
قالت تماديت قلت الحــــــب ذابحــــني
مــــن عــــرفتي لك وانا بالحب متمادي
ذي غلطتك ليه باحساسك تصارحـــــني
وترقى معي للجــــبل ياساكـــن الوادي
لاضقت بالكـــون مـــــن غيرك يمازحني
من فيه غيرك تعب يبحث عن اسعادي
انت الـــــذي بـــــــد خلق الله فاضحــني
عرفت عمقي وتسكـــــــن داخل فوادي
وانت الذي ياجـــنون الحــــــب شارحني
كنك معي عايش ٍ مــــن يـــــوم ميلادي
دور المثالي
ودي أصيرك يـــوم واعـرف خفاياك
ودي افتش عمق../..عمقك لحـالي
ودي اقلـــّب في دفاتــــــر سجاياك
ودي اعيشك وانت حلــــــم ٍ خيالي
دامي عــرفت ادناك محتاج لقصاك
محتاج اذوقك مــر.. لوكنت حــالي
احس انا ( لولاي) تحـــتاج ( لولاك)
خلك تصيــر اول..وانا اصيــر تالي !
محتاج اشوف اسرار هذا..وهذاك
سحر الجنوب..وكل عمق الشمالي
خليني اغـــــرق فيك بالحيل والقاك
لاصرت انا المجنون جـــرّب هبالي !
ودي اعيش بوسط لجّــــــة خطاياك
مليت من تمثيـــــــل دور المثالي !!
هدايا سراجي
حاولت اعــدّي كذبتك في مـــزاجي
وافتش القامـــوس واخلق لك اعذار
واحميك من قسوة مواسم عجاجي
من هو يعيش بظل مايعـــــرف غبار
اجمل حروفك من هــــدايا سراجي
ياما زرعــــــت بتربتك ورد .. واشعار
هالحين خلك خلف ســــور ٍ زجاجي
شاهد تحوّل موسم العــــــج لامطار
مـن خــــلف هالغبرة زرعت إبتهاجي
وانت تعبت مـن المشي عــــدّة إمتار
ومـــن بعد هـــذا لاتعكّر مـــــــزاجي
جميـــع مايبنى على الـــــــــزيف ينهار
مرجيحة الحب
على سفينة حلمنا .. عشــرة ايام
لحظاتها .. بين الحـــبايب جميلة
فيها جنون وحب واشواق والهام
مثل العسل تشفي كبـود ٍ عليله
الليل في مــرجيحة الحب لاهام
مــن فـوقها يجمع خليل ٍ وخليله
في مشهد ٍ فجّــــر براكين والغام
وغابت عـن المشهد نفوس ٍ ثقيله
ودارت سواليف ٍ تعطّـــر بالاحـلام
مابين ذي ممكن..وذي مستحيلة
عشنا حـياة الحب فـي عشرة ايام
عنــوانها عشــق الاصــيل لـ اصيلة
شموخ الحب
كنتي شموخ الحب .. صدقه والاصـرار
ديمـــــــومته .. واجـــمل معانيه كنتي
كنتي عمــــــر غطى على كـــل الاعـمار
وفي كـــــل لحظة مــن حـياتي سكنتي
كنتي ســــحابة سيلها بــــــــوح واشعار
لاضاق صـــــدري مــن عنا الوقـت بنتي
وسط جفــاف الوقــت كنتي لي امــطار
انتي ارتـــواء القلب بالحـــــب .. وانتي..
الناس والاحساس والثلــــــــــج والنار
ولاشانت ظـــروفي مــع الوقت .. زنتي
مــرت سنين طـــوال في حــــب وإبهار
عشنا بها مااذكـــــــــر ولا يـــــوم شنتي
كنتي صخب وجنـــــــون والهام واسرار
مستغرب ٍ وشلــــــون مــــــني مكنتي؟
كنتي جريئة فـــــــي كلامـــــك والأفكار
مااذكـــــر وعـــدتيني بحاجـــة .. وخنتي
واليـــوم وينك؟..احمد بــــدونك إحتار
معقـــول للعــــذال والوقـــــت لنتي؟!
ارجــوك عــــودي بيننا الـــــــف تذكار
فــي كــــــل شبر مــــن حياتي وسنتي
راحوا
ياضيقة بالصـــــدر .. يادمعة العــــين
مـن زود جـــرح الفقد بالنفس باحوا
ماهو جــديد الجرح ينزف من سنين
وانا تعبت وطحـــت مـن يوم طاحـوا
كـنا نقـــاوم لحـــظة العســر باللـين
واليــــوم لامــني تبسمت .. لاحـــــوا
راحــــوا وغابـــوا عن سماي الوفيين
وبالبال مثل المسك والعــود فاحـوا
ابــــوي وامـــي .. والشقيقات ثنتين
مـع زوجــتي .. اغلى المحبين راحـوا
عساهـــــــم بجنتك يارب فــــــرحين
ومن فيض جـودك بالقبور إستراحوا
سلاااام
يللي تنادون القمـــــــر وسـط الظــــلام
شوفــــوا الليالي المظلمة وشلــــونها؟!
مانلتفت للخـــــــلف..حــــنـا بالأمــــــام
الله عطانا المــــــــرجلة وفنــــــــــــونها
الله منحنا الفعــــل واعطاكــــم كـــــلام
نعمه من المــــــــولى لـــزوم نصــــونها
بالعقـــــــل والحكـمـــــــة رقينا للسنام
في قمـــــــــة ٍ ماتت رجــــــــــال ٍ دونها
من فحفحة( نجــــلا )الى كحة( هيام )
كل الســــــــــوالف عندكم ياهـــــونها !!
تماااام خلـــــوكم ابهالحاله تمــــــاااام
لاتتعــــــــبون شفاهـــــــــكم بسنــونها
دام الجبــــــل جــــــاوز بهامته الغمام
اكيـــــــــد به ناس ٍ تغيّــــــــر لــــــونها
ســـــــلااام وختام القصــــيدة بالسلام
ذي قنبلة والمـــــــوت فــي مضمونها!
محتاج للبوح
مليت مــن صمتي ومحتاج للبـــــوح
للجــــــادل اللي للفــــؤاد إستباحت
اشبعتها حـــــزن ومتاهات وجــروح
مفتــونة ٍ فيني وهـــــي ما استراحت
اخترت انا الوردة وهي داخل الدوح
وفــــركتها فـــي راحتيني وفاحـــــت
كم مــــرّة قالت : حبيبتك بـ تــــروح
واقــــــول : روحي بس للقلب راحت
اخر زعـــــل مابيننا كسرة اللـــــــوح
محيتها واثــــــر اللعينة!! تماحــــــت
والحين مــر شهور ماشفت له ضوح
واستبدلت رقمه ودقــــــت وساحت
قالت قســـــم بالله مااروح .. مااروح
صـــوتك يـرد الروح يـ احمد وصاحت
وضح النقا
خذها على وضح النقا ..!
مااحب انا الشخص الكريه ..!
ومامشي مع دروب الشقا ..!
درب الشقا مااحد ٍ يبيه .. !
" كنّا " حبايب واصدقا ..!
واسمع كلام ٍ تحتريه ..!
مااحد ٍ لمنزلتك رقى ..!
محـــفوظة ٍ لومانت فيه ..!
مــــــكانك الأول بقـــى ..!
خالي ..مثل ماهو عليه ..!!
سنين ابعد
سنين ابعد وجت همسه
اعادت حاضـــري لـ امسه
رجعت امـارس الاشــــعار
بسجن حـروفك الخمسة
بــدت تزهــــــــــر كتاباتي
وفاح العطـــــــــر بـ ابياتي
اذا جيت ابتعـــــــــد عنك
هرب من داخـــــلي ذاتي
تعـــــــــــالي .. لاتخليـــني
مـــعك كامـــــــل عناويني
إلى جيتي مــع الاهــــداب
نزعتي الشـوف مــ،ن عيني
احسك نغــــــم في صوتي
واذوقك طعــــم في قوتي
تعالي نجمــــع الاضــــداد
انا الميــــــلاد .. يامـــوتي
إقبلي
اقبلي مثل الامـــــل لاطــال وقته
اقبلي مثل الفـــرح مثل السحاب
اقبلي لي حــــــلم لاشفته عشقته
وامسحي عن خافقي لون العذاب
الهـــــنا لولاي مــــن عينك سرقته
ماعــــرفت مـن الهنا غير السراب
وعمري اللي راح في عمرك لحقته
وانفتح لي بالامـــــل مليـــون باب
اقبلي مع درب ماعمـــــري طرقته
اقبلي دمعــــة وبسمة .. وإغتراب
اقبلي مثل البحــــر مهما اخترقته
روعـــــــة اللــــــولو تنسيك الاياب
اسبقيني للـــــزمن .. دامي سبقته
ينتهي جـــرح التساؤل بالجــــواب
اعراس الدهشة
لجــــل طبعي ثلاث سنين تدرس عن طباع الناس
جهــــــــــود ٍ غير عـــــــادية بذلتيها وانا عـــــــــادي
زرعتي حـــقل للبسمة وقاومتي جــــــــفاف الياس
صنعتي للجبل هيبة .. واعـــــــــدتي الظل للوادي
وقلتي قاوم احساسك .. وانا مسكون بالاحساس
جيوشه وإنتصاراته بـــدت لحظات ميــــــــــــلادي
وصارحــــــــــتك وقاومتي وسميتك قــــــوية باس
وقلتي قبل ماانهيها تذكــــــــــــــــــــــر اينا البادي؟
تعبتي باجتهاداتك وعلـــــــــــم النفس لك مقياس
بـــــــــدت تسري قوانينه على المشروب والزادي
عطيتك كامـــــــــل الفرصة لعلك تدخلين الراس
هناك اعــــــــــراس للدهشة وحرب ٍ جوها هادي
احس ان الخُطى تاهت وذاب الحرف بالقرطاس
علــــــــــــوم الكـــــون ماتهدي .. ولكن ربنا الهادي
انا يكفيــــــــن تفكيرك وعلمك عـــن طباع الناس
جهـــــود ٍ غير عـــــــــــــادية بذلتيها وانا عــــــادي!
خليجية
معروفة في حسنك علم
ريــــــــم ٍ مراعيه القيـــم
انت ِ سعــــودية اكيــــــد
هجــــــرك يسبب لي الم
قالت يانعـــــم ٍ بالبـــــلاد
واللــــي سكنها والنعـــم
انت ِ الامـــــــــاني والمنى
صـــــدك يسبب لي العنا
ياام الحــــــلا ياام السمار
انت ِ مـــن كــــويت الهنا
قالت لي اهــل ٍ بالكويت
حــــــــاول تـــدوّر من انا
مادمــتي آيـــــة للبشـــــر
تطعن مـــن سهوم النظر
معـــــروف اصلك ياملاك
ظبي ٍ تــــربى فـي قطـــــر
قالت قطر هي عـــــزوتي
هـــذا جــــوابي المختصر
شفت التغلي والــــــدلال
وعـــرفت من وين الغزال
انت ِ مـن امــــــارات البها
بالحسن هي مضرب مثال
قالت .. ذي ارض ٍ غــــالية
يسكن بها اعمام وخـــوال
ادركـــــت خـفت ظـــــلها
قلت إسمعـــي ذا حــــلها
بحـــــــرين ارضك ياغزال
اللـــــي ربيت بظــــــــلها
قالت لي اخــــوان ٍ هناك
وان جيتــــــها ما مـــــلها
قلت انت ِ من اجمل مكان
واحاتـــها مــــــــرتع حسان
فتشت في كــــــل الخليج
واثـــر الحبيبة من عُـــمان
قالت عُمان ارض الكـــــرم
واسمع جـــــوابي باللسان
انا بنت ..... عصـــــــــــريّة
اهــــــــــدافها حـــــــــــيّه
تعـــــــــرف مــن البحرين
حـــــــــــب السعــــــودية
وازرع إمـــــــــــــــــــاراتي
بـ ارض ٍ كـــــــــــــــــويتية
قطــــــــــــــر تعيش بعين
والاخــــــــــرى عمـــــــانية
انا مــــــــــزيج الحــــــــب
واسمــــــي .. خليــــــجية
صعاليك وسباع
ياكـــل تفكيــــــــري وبعض إنشغالي
مابيك ترحل داخلي..من رحل ضاع
دامك تقـــول الشاعـــــر اكبر خيالي
انا خيالي فيه مـــــن كل الانـــــــواع
خلك بعيــــــــد .. وخلني عنك سالي
اخــاف لاقــــــرّبت بالحيــــــل ترتاع
خــلك تعيش ايام عمـــــــرك مثالي
كم شاعـر ٍ مايحفظ العهــــد لاجاع!!
ارجــوك لاتدخـــــل بطيشك مجالي
مابيك تدخـــــل في متاهات وصراع
تلقى لي اول بس مـــن غيـــــر تالي
فــــي داخلي تحــيا صعاليك وسباع
اكبر دعاية
تصدقــــــون الحـــــب اكبر دعـــــــــاية
كـــــــذبه كبيرة روجــــ،تها الاساطــــير
ادري كلامـــــي مـزعـــــــج ٍ بالبــــداية
مُحبط لبعض الناس لكــــن عسى خير
ممكن يصير الحــــ،ب مــــن شان غاية
وممكن يكــون الحــــب مسلك وتبرير
وممكــــن يكون الحـــــب مثل الهواية
مثل الرســــم ..مثل القصص والتعابير
وممكــن يزيـــــــد شـــوي يصبح غواية
مثل الرياضة فـي عقــــول الجــــماهير
ممكن من اجل اهـــــداف تكتب رواية
وممكن من اجل اغراض تقتل عصافير
هـــــذي الحكاية .. وإختصار الحــــكاية
الحـــــــــب كـــــــذبة روجتها الاساطير
الظبا والحباري
لاتنزعج من قلب مغليك بالحيل
لا صار مدهــــال الظبا والحباري
كل السحاب اللي تمرّه بها سيل
والسيل ميعاد الفــرح للصحاري
قلبي نهــــــار وبإتساعه كما الليل
تسري على قمراه بعض الضواري
كل النجـــوم الساطعات القناديل
فيها مـن اللي نادمــــــوها مواري
قلبي فضا واشجار رمث ومعاميل
ترعى به احــــــلام ٍ وتنبت طواري
لاتشغلك كثر الظــــبا والرجاجيل
ماتشتكي كثر الضيـــــوف البراري
سحر العيون الناعسات المظاليل
واحلى الجمال اللي يلف الجواري
وبعض القصايدوالقصص والتعاليل
اذا انتهت تذري عليها الـــــــذواري
قلبي اذا انك تجهــــــــله كنه النيل
مفتوح للعالـــــــم بشكل ٍ حضاري
خصــــك بحبــــــه بالليال المقابيل
وانته بغمـــرة شــــوق مانته بداري
خاتمة
ليست هذه نهاية الحكاية، بل آخر صفحة من ديوان، وأول صفحة في ذاكرة قارئ. فما كُتب بصدقٍ، يبقى... كما يبقى المطر في الأرض، ويبقى العطر في الروح.
احمد الناصر الأحمد
2026-1448
تعليقات
إرسال تعليق